"ეს ინიციატივა იმ პრობლემებს, რაც საქართველოშია სრულად არ პასუხობს"- "თეთრი ხმაური" გირჩის ინიციატივას ნაწილობრივ იზიარებს

პოლიტიკა - 15:09, 16 Nov, 2016

1510

მოძრაობა "თეთრი ხმაური" ახალი პოლიტიკური ცენტრის - გირჩის ინიციატივას, რომელიც ახალ წლამდე ნარკოტიკებთან დაკავშირებული კანონმდებლობის შეცვლას მოითხოვს, იზიარებს. როგორც „ნიუპოსტს“ მოძრაობის ერთ-ერთმა აქტივისტმა დავით სუბელიანმა განუცხადა, მოძრაობა ჩამოყალიბდება, მიიღებს თუ არა მარიხუანას საჯაროდ დარგვის პროცესში მონაწილეობას.

"თემა ძალიან ახალია, ამიტომ ჩამოვყალიბდებით მივიღებთ, თუ არა მონაწილეობას. რაც დანამდვილებით შემიძლია გითხრათ, არის ის, რომ ნარკოტიკებთან დაკავშირებული კანონმდებლობის შეცვლა აუცილებელია. მხარს ვუჭერთ გირჩის ამ ინიციატივას, თუმცა აქვე ვაცხადებთ, რომ ეს ინიციატივა სრულად არ პასუხობს იმ პრობლემებს, რაც საქართველოში გვაქვს. ყველა ნარკოტიკის მოხმარების დეკრიმინალიზაციაა აუცილებელი, როგორც პირველი ნაბიჯი"- აღნიშნა "თეთრი ხმაურის" აქტივისტმა.

დღეს გირჩის ლიდერმა ზურაბ ჯაფარიძემ საგანგებო ბრიფინგზე, ახალ მთავრობას მიმართა, რომ ახალ წლამდე შეცვალოს ნარკოტიკებთან დაკავშირებული კანონმდებლობა. წინააღმდეგ შემთხვევაში, გირჩის წევრები, სრულწლოვან მოხალისეებთან ერთად 31 დეკემბრის დღის ბოლოს, საჯაროდ, პირდაპირ ეთერში მარიხუანას დარგავენ.