მარიხუანას დარგვა პირდაპირ ეთერში - "გირჩი" ხელისუფლების ნარკოპოლიტიკას აპროტესტებს

პოლიტიკა - 12:27, 16 Nov, 2016

12198

აპც „გირჩმა“ დღეს საგანგებო ბრიფინგი გამართა. ახალი პოლიტიკური ცენტრის დამფუძნებელმა ზურაბ ჯაფარიძემ ქვეყანაში არსებული ნარკოპოლიტიკის შესახებ ისაუბრა და განაცხადა, რომ ხელისუფლება მანიპულირებს საზოგადოებრივი აზრით და საკუთარ მოქალაქეებს წნეხის ქვეშ ამყოფებს. გირჩი ხელისუფლებას ნარკოპოლიტიკის შეცვლისკენ მოუწოდებს და ახალ წლამდე მარიხუანასთან დაკავშირებული ნივთიერებების მოხმარების და კულტივირების ლეგალიზებას მოითხოვს.

“მავნებლურმა კანონმდებლობამ გაუმწარა ცხოვრება 100 ათასობით მოქალაქეს და შეიწირა 2 მოქალაქის სიცოცხლე. ჩვენ მივმართავთ მომავალ პარლამენტს და მთავრობას და მოვითხოვთ, რომ ახალ წლამდე შეცვალოს ნარკოტიკებთან დაკავშირებული კანონმდებლობა და მარიხუანას და მასთან დაკავშირებული პროდუქტების მოხმარება გახდეს ლეგალური, ასევე კულტივირება და შენახვა პირადი მოხმარებისთვის იყოს სრულად ლეგალიზებული. მომავალ ხელისუფლებას ექნება საკმარისი დრო საკანონმდებლო ცვლილებების განსახორციელებლად. თუ ხელისუფლება ამას არ გააკეთებს 2016 წლის 31 დეკემბერს 23:59 წუთზე ჩვენ "გირჩის" წევრები, "გირჩის" ოფისში პირდაპირ ეთერში დავრგავთ მარიხუანას. ჩვენ გვესმის, რომ ამით დავარღვევთ სისხლის სამართლის კოდექსის 265-ე მუხლს, რაც ითვალისწინებს სისხლის სამართლის პასუხისმგებლობას 6-დან 12 წლამდე. ჩვენ არ ვართ შეშლილები, მაგრამ ეს არის თავისუფლებისთვის ბრძოლის პოლიტიკური გზა.“- განაცხადა ზურაბ ჯაფარიძემ.