საქართველოს პრეზიდენტის ადმინისტრაცია დეპუტატებს მოუწოდებს ნაჩქარევი განცხადებებისაგან თავი შეიკავონ

პოლიტიკა - 10:11, 16 Nov, 2016

1690

ამ დრომდე გაურკვეველია როდის დანიშნავს საქართველოს პრეზიდენტი მეცხრე მოწვევის პარლამენტის პირველ სხდომას.

როგორც "ნიუპოსტს" პრეზიდენტის ადმინისტრაციაში განუცხადეს, გიორგი მარგველაშვილი პარლამენტის პირველ სხდომას ცესკოს მიერ შემაჯამებელი ოქმის გამოქვეყნების შემდეგ მოიწვევს. ცესკოს კი არჩევნების შემაჯამებელი ოქმი ჯერ არ გამოუქვეყნებია.

„ცესკოს არჩევნების შემაჯამებელი ოქმი ჯერ არ გამოუქვეყნებია. შესაბამისად, კონკრეტული თარიღი და დრო, თუ როდის დანიშნავს საქართველოს პრეზიდენტი მეცხრე მოწვევის პარლამენტის პირველ სხდომას ჯერ უცნობია. ჩვენ არაერთი ნაჩქარევი განცხადება მოვისმინეთ დეპუტატებისგან სხვადასხვა თარიღთან დაკავშირებით, თუმცა ზუსტი დრო მხოლოდ მაშინ გახდება ცნობილი, როდესაც ცესკო გამოაქვეყნებს არჩევნების შემაჯამებელ ოქმს და პრეზიდენტი გამოსცემს შესაბამის სამართლებრივ აქტს“- უთხრეს "ნიუპოსტს" ადმინისტრაციაში.

კანონმდებლობის მიხედვით, ახალარჩეული პარლამენტის პირველი სხდომის დღეს პრეზიდენტი ნიშნავს. ახალარჩეული პარლამენტის პირველ სხდომასაც სწორედ პრეზიდენტი ხსნის .

პარლამენტი პირველივე სხდომაზე აირჩევს პარლამენტის თავმჯდომარეს და ვიცე-სპიკერებს, ასევე დააკომპლექტებს კომიტეტებს და აირჩევს მათ თავმჯდომარეებს.
ცნობისთვის, "ქართულ ოცნებაში" აცხადებენ, რომ მე-9 მოწვევის პარლამენტი პირველად 18 ნოემბერს შეიკრიბება. მათივე ინფორმაციით, სხდომა ქუთაისის პარლამენტში 12:00 საათზეა ჩანიშნული.