"როგორც რეგიონისთვის, ისე საქართველოსთვის მთავარი საფრთხე არის რუსეთის მიმდინარე ოკუპაცია საქართველოს სუვერენული ტერიტორიების ასევე ყირიმის ოკუპაცია - ანექსია და ამ ტერიტორიებზე გამალებული მილიტარიზაცია, სამხედრო კომპონენტის განლაგება. ამ საფრთხეების შესაკავებლად აუცილებელია ჩვენ თავდაცვითი შესაძლებლობები განვავითაროთ, ასევე აქტიურად ვიმუშაოთ ჩვენს პარტნიორებთან. ნატოს წვრთნები სწორედ ამას ემსახურება, რუსეთის შემდგომი აგრესია შეაკავოს. რაც შეეხება რუსეთის საგარეო საქმეთა სამინისტროს განცხადებას, ის მიმართულია იმისკენ, რომ გარკვეული ფსიქოლოგიური ეფექტი შექმნან და ზეწოლა მოახდინონ როგორც საქართველოზე ისე, ნატოელ პარტნიორებზე, რათა პოლიტიკური ამოცანების მიღწევის საშუალება გააჩინონ - ეს არის ე.წ ჰიბრუდული ომის შემადგენელი კომპონენტი და მიმართულია იქითკენ, რომ საქართველოს დემოკრატიული განვითარება შეაჩეროს და დააბრკოლოს ჩვენი სუვერენული არჩევანი ევროპული და ევროატლანტიკური სამყაროს სრულუფლებიანი წევრობა"- უთხრა "ნიუპოსტს" ბათუ ქუთელიამ.

მისი თქმით, საქართველოს ხელისუფლებამ მსგავსი განცხადებებს არც უნდა უპასუხოს.

"ხელისუფლებას კარგად უნდა ჰქონდეს შემუშავებული სტრატეგია და ასევე სტრატეგიული კომუნიკაციის გეგმა მსგავს პირობებში რა პასუხს სცემს ან საერთოდ სცემს თუ არა პასუხს ამ განცხადებას. რადგან მსგავსი განცხადებების ერთ-ერთი ამოცანაა პოლიტიკური და უსაფრთხოების დღის წესრიგის მათ მიერ მართვაა. შესაბამისად იმ სტრატეგიიდან გამომდინარე, რასაც საქართველოს ხელისუფლება აირჩევს, ერთ-ერთი გამოსავალია ის რასაც ესტონეთის ხელისუფლება აკეთებდა. ის საერთოდ უგულვებელყოფდა რუსეთის მსგავს განცხადებებს და მიზანმიმართულად აგრძელებდა თავის სტრატეგიულ გზას, რომელიც არჩეული ჰქონდა. ჩემი აზრით ეს ყველაზე კარგი პასუხია და არა რუსეთთან პოლემიკაში ჩართვა, რადგან ეს ავტომატურად აძლევს რუსეთს საშუალებას თავისი საკითხები ჩვენს პოლიტიკურ დღის წესრიგში შემოიტანოს"- დასძინა ბათუ ქუთელიამ.

საქართველო-ნატოს სამხედრო წვრთნებს მოსკოვი რეგიონისთვის დიდ საფრთხედ აფასებს. განცხადება რუსეთის საგარეო საქმეთა სამინისტროს ვებ გვერდზე გამოქვეყნდა.