ლარის კურსი და სოციალური საფრთხე - პრეზიდენტი მთავრობას ესწრაფი ქმედებებისკენ მოუწოდებს

პოლიტიკა - 15:04, 15 Nov, 2016

2259

საქართველოს პრეზიდენტი ლარის კურსის საკითხს გამოეხმაურა. როგორც დღეს გამართულ ტრადიციულ პრესკონფერენციაზე პრეზიდენტის პრესმდივანმა ეკა მიშველაძემ განაცხადა, პრეზიდენტი იმედს გამოთქვამს, რომ აღმასრულებელი ხელისუფლება და ეროვნული ბანკი, მოკლე დროში შეძლებენ ჩამოაყალიბონ ეროვნული ვალუტის სტაბილიზაციის სამოქმედო გეგმა და მიიჩნევს, რომ ასეთ დროს საჭიროა სწრაფი, ეფექტიანი და ზოგჯერ არაორდინალური ნაბიჯების გადადგმაც კი:

„გვინდა ერთ-ერთი ყველაზე მნიშვნელოვანი თემით დავიწყოთ. ლარის კურსის ცვალებადობა, რომელიც, პირველ რიგში, პრობლემებს უქმნის მოსახლეობას და შესაბამისად დღეს ეს არის ის პრიორიტეტული თემა, რომელზეც ზრუნვა ხელისუფლების უპირველესი ამოცანა უნდა იყოს - ამ თემასთან დაკავშირებით პრეზიდენტი მუდმივ კომუნიკაციაში იმყოფება საქართველოს მთავრობასთან და ეროვნული ბანკის ხელმძღვანელობასთან.

გიორგი მარგველაშვილი ინფორმირებულია იმის თაობაზე, რომ შესაბამისი უწყებები პრობლემის გადასაჭრელად კოორდინირებულად მუშაობენ, რასაც პრეზიდენტი მიესალმება. საქართველოს პრეზიდენტი იმედს გამოთქვამს, რომ აღმასრულებელი ხელისუფლება და ეროვნული ბანკი, მოკლე დროში შეძლებენ ჩამოაყალიბონ ეროვნული ვალუტის სტაბილიზაციის სამოქმედო გეგმა. პრეზიდენტი მიიჩნევს, რომ ასეთ დროს საჭიროა სწრაფი, ეფექტიანი და ზოგჯერ არაორდინალური ნაბიჯების გადადგმაც კი, იმისათვის, რომ მოსახლეობის სოციალურ პირობებს საფრთხე არ შეექმნას.“- განაცხადა ეკა მიშველაძემ.