ევროკავშირის საგარეო საქმეთა მინისტრების შეხვედრის ფარგლებში, ერთ-ერთი განსახილველი საკითხი საქართველოსა და უკრაინის ევროკავშირთან უვიზო მიმოსვლა იყო.

ევროკომისარი ფედერიკა მოგერინი აცხადებს, რომ საგარეო უწყებების ხელმძღვანელები თანხმდებიან, რომ ქართულმა მხარემ ყველა დაკისრებული ვალდებულება შეასრულა და უვიზო მიმოსვლას ევროპასთან რაც შეიძლება მოკლე დროში იმსახურებს.

"საქართველოსა და უკრაინისთვის უვიზო მიმოსვლა, ეს ის საკითხია, რომელიც მე დასაწყისშივე წამოვჭერი და მინისტრებმა განიხილეს ის. საგარეო საქმეთა მინისტრებმა მკაფიოდ დააფიქსირეს, რომ ეს არის პრიორიტეტული ევროკავშირისთვის, რადგან საქართველომ შეასრულა კრიტერიუმები და არსებობს გადაწყვეტილება, რომ წინ წავიდეს პროცესი ამ მიმართულებით. მოუთმენლად ველი პრემიერმინისტრის სტუმრობას. ყველასთვის ნათელია რომ საქართველოში სიტუაცია საკმაოდ პოზიტიური და იმედის მომცემია და ევროკავშირის მხრიდან უნდა მოხდეს სავიზო რეჟიმის ლიბერალიზაციის მხარდაჭერა," - განაცხადა ფედერიკა მოგერინიმ.