ტაქსების ლიცენზია და რეგულაციები მძღოლებითვის - ,,მერიის გეგმა ბუნდოვანია და არ არის კონკრეტული ჩამონათვალი“

პოლიტიკა - 17:42, 14 Nov, 2016

4261

დედაქალაქის მერმა დავით ნარმანიამ განაცხადა, რომ ტაქსების ლიცენზიასთან დაკავშირებით მხოლოდ ძირითადი მონახაზია შემუშავებული. ამ თემასთან კავშირებით „ნიუპოსტი“ „საქართველოს ტრანსპორტისა და გზების ასოციაციის“ პრეზიდენტს დავით მესხიშვილს დაუკავშირდა, რომელმაც ჩვენთან საუბარში აღნიშნა, რომ მონახაზი არის ბუნდოვანი და არ არის კონკრეტული ჩამონათვალი გაკეთებული.

„სამუშაო ჯგუფში ჩართულია ჩვენი არასამთავრობო ორგანიზაცია, მონახაზი არის ბუნდოვანი, არ არის კონკრეტული ჩამონათვალი. მერიას აქვს ასეთი ჩანაფიქრი, რომ ერთი მიმართულება იყოს მგზავრის უსაფრთხოება მძღოლთან მიმართებაში, და მეორე ავტომობილთან დაკავშირებით ტექნიკური მიმართულება. იქ არის ასევე ჩანაწერი მაგალითად მძღოლის ჯანმრთელობის, ნარკოლოგიური და ნასამართლეობის ცნობა, მაგრამ ჯანმრთელობის ცნობა ისე თუ უნდა გაიცეს, როგორც დღეს გაიცემა, ნებისმიერს შეუძლია 30 ლარად აიღოს და იყოს შეუსაბამო, ამის წინააღმდეგი ვარ. რაც შეეხება ტექნიკურ დათვალიერებას, როგორც ვიცით ყველამ უნდა დავიწყოთ 2018 წლიდან მანქანების ტექნიკური შემოწმება. ასე უცებ რომ ტაქსებმა ტექნიკური დათვალიერება გაიარონ, ვერ მოხერხედება.

რაც შეეხება, ტაქსების რაოდენობას, ამისთვის მერია ფიქრობდა, რომ დაეწყო რეგისტრაცია. მერია დათანხმდა, რომ მხოლოდ 10 000 ლიცენზია ყოფილიყო, ამ რეგულაციის მომხრე არ ვარ. დედაქალაქში უნდა იყოს თუ არა მხოლოდ 10 000 ტაქსი, ეს ბაზარმა უნდა დაარეგულიროს. იმოძრავებს იმდენი ტაქსი, რამდენსაც ექნება სურვილი მუშაობის. მთავარია მოთხოვნები დააკმაყოფილონ. ეს არ მიმაჩნია დედაქალაქის ნომერ პირველ პრობლემად, მაგრამ რადგან დაიწყო ამაზე საუბარი, ვართ ჩართულები“- განაცხადა მესხიშვილმა.