თამაშგარე მინისტრები: ხადური, გიორგაძე და ჯავახიშვილი - რა ცვლილებებია მოსალოდნელი მთვრობაში

პოლიტიკა - 12:54, 14 Nov, 2016

8155

19 ნოემბრამდე ქვეყანას ახალი პარლამენტის პარალელურად, ახალი მთავრობაც ეყოლება.
ცნობილია, რომ ცვლილება ძალოვან მინისტრებს არ შეეხებათ, თუმცა პრემიერ-მინისტრი გიორგი კვირიკაშვილი აღნიშნავს, რომ მთავრობაში ცვლილებები აუცილებლად განხორციელდება.
"ნიუპოსტის" ინფორმაციით, თანამდებობებებს ეკონომიკური გუნდის მინისტრები, ხადური და ჯავახიშვილი დაემშვიდობებიან.
ნოდარ ხადური ახალ მთავრობაში საერთოდ აღარ იქნება. მას ამ თანამდებობაზე პირველი ვიცე-პრემიერი და ეკონომიკის მინისტრი დიმიტრი ქუმსიშვილი შეცვლის.
ეკონომიკისა და მდგრადი განვითარების მინისტრად სავარაუდოდ დაინიშნება გიორგი გახარია, რომელიც ამ დროისთვის ეკონომიკური საბჭოს მდივანია.
მმართველ გუნდში პირად საუბრებში ადასტურებენ, რომ თანამდებობას კულტურის მინისტრის მიხეილ გიორგაძეს მერიის კულტურის საქალაქო სამსახურის უფროსი ია მაქაცარია ჩაანაცვლებს.
ვაკანტურია ევრო სტრუქტურებთან ინტეგრაციის საკითხებში სახელმწიფო მინისტრის პოსტიც. დავით ბაქრაძე საქმიანობას ამერიკაში, საქართველოს ელჩად განაგრძობს.

სამთავრობო ცვლილებებთან დაკავშირებით პრემიერ-მინისტრი კომენტარის გაკეთებას არ ჩქარობს.

ჟურნალისტებთან განმარტებებს არ აკეთებს არც ვიცე პრემიერი, ეკონომიკის მინისტრი დიმიტრი ქუმსიშვილიც.

ახალი მთავრობის ფორმირება მას შემდეგ მოხდება, რაც ახალი პარლამენტი შეიკრიბება. კანონის თანახმად, 19 ნოემბრამდე უნდა ჩატარდეს პირველი სხდომა, როდესაც პრემიერმინისტრის კანდიდატურას წარადგენენ.

პრემიერის კანდიდატურა პრეზიდენტმა უნდა დაამტკიცოს ცნობილია, რომ ახალი მთავრობის მეთაური კვლავ გიორგი კვირიკაშვილი იქნება. ამ თანამდებობაზე წარდგენის შემდეგ, მას მთავრობის ფორმირებისთვის ერთ კვირიანი ვადა აქვს.