"არ ვაკეთებ კომენტარს"- ეკონომიკის მინისტრს ლარის გაუფასურებაზე საუბარი არ სურს

პოლიტიკა - 10:31, 11 Nov, 2016

3341

ეკონომიკის მინისტრი ლარის კურსთან დაკავშირებით კომენტარს არ აკეთებს. დღეს დიმიტრი ქუმისშვილმა ჟურნალისტების შეკითხვას არ უპასუხა.

"ქართულ ოცნებაში" კი აცხადებენ, რომ პანიკის საფუძველი არ არსებობს. გია ვოლსკის განცხადებით, ვითარების მძაფრად წარმოაჩენას ოპონენტები ცდილობენ.

“პანიკის საფუძველი არ არსებობს, მძიმე პროცესების ფონზე, რაც მიმდინარეობს, საქართველომ შეინარჩუნა სტაბილურობა და ვფიქრობ, ამ საკითხთან დაკავშირებითაც ექნება ძალიან გამართული პოზიცია, რათა ის საფუძველი, რაზეც საუბრობენ პოლიტიკური ტრიბუნიდან ცალკეული პიროვნებები არ გამართლდეს და რეალობაში მოხდეს ის, რასაც ყველა ველოდებით, სტაბილიზაცია,“ - განაცხადა გია ვოლსკიმ.

"ნაციონალური მოძრაობა" ლარის გაუფასურებით გამოწვეულ პრობლემებზე პასუხისმგებლობას ხელისუფლებას აკისრებს.

„ინვესტიციები შემცირებულია, შემცირებულია ექსპორტი და ბუნებრივია, ასეთ პირობებში ძალიან რთულია ვილაპარაკოთ იმაზე, რომ ჩვენი ეკონომიკური მდგომარეობა გამოსწორდება. მთავრობამ უნდა შეწყვიტოს ის ქმედებები, რაზეც დიდი ხანია ვაფრთხილებთ. ეს არის შიდა ვალის აღება, ეს არის საბიუჯეტო ხარჯვა და რა თქმა უნდა იმისთვის, რომ ბიზნესმა დაინახოს, რომ რაღაცის გამოსწორება შესაძლებელია, მომავალი წლის ბიუჯეტი უნდა იყოს წარმოდგენილი სრულიად სხვაგვარად,“ - აცხადებს ზურაბ ჭიაბერაშვილი.

ლარის ოფიციალური კურსი დღეისათვის 2 ლარი და 48 თეთრია.