"ყოველთვის არც ამერიკელები არიან აღფრთოვანებული ჩვენი არჩევანით, მაგრამ მეგობრობას აგრძელებენ"- უსუფაშვილი

პოლიტიკა - 13:44, 10 Nov, 2016

1687

ამერიკის შეერთებული შტატების საპრეზიდენტო არჩევნებში დონალდ ტრამპის გამარჯვებას საქართველოს პარლამენტის თავმჯდომარე გამოეხმაურა. დავით უსუფაშილის თქმით, აშშ-ს ახალი პრეზიდენტის პირობებში უშუალოდ ქართულ-ამერიკულ ურთიერთობებში რაიმე პრობლემა არ გაჩნდება, თუმცა ის გარკვეულ გამოწვევებს ელის საერთაშორისო უსაფრთხოების და საერთაშორისო პოლიტიკის სისტემაში. როგორც დავით უსუფაშვილმა განაცხადა, არც ამერიკელები არიან ყოველთვის აღფრთოვანებული ქართველების არჩევანით, თუმცა სტრატეგიულ მეგობრობას მაინც აგრძელებენ:

„აშშ-ში მნიშვნელოვანი პოლიტიკური პროცესი დასრულდა ისე, როგორც არც აშშ-ში და არც მის ფარგლებს გარეთ შესაძლოა ბევრი არ ელოდა, ეს არის ამერიკელი ხალხის არჩევანი. ყოველთვის არც ამერიკელები არიან აღფრთოვანებული იმით, რა არჩევანსაც ჩვენ - ქართველები ვაკეთებთ, მაგრამ ამის მიუხედავად, ისინი ჩვენთან სტრატეგიულ მეგობრობას აგრძელებენ. მე არ მგონია, რომ ახალი პრეზიდენტის პირობებში ქართულ-ამერიკულ ორმხრივ ურთიერთობებში რაიმე პრობლემები გაჩნდება. მე უფრო ველოდები გარკვეულ გამოწვევებს საერთაშორისო სისტემაში - საერთაშორისო უსაფრთხოების, საერთაშორისო პოლიტიკის სისტემაში, სადაც დღემდე შეინიშნებოდა პასუხისმგებლობებისა და ინიციატივების დეფიციტი. ამ თვალსაზრისით აშკარად იქნება გამოწვევები, რაც ჩვენთვის მნიშვნელოვანია.“- განაცხადა უსუფაშვილმა.

პარლამენტის თავმჯდომარემ იმ ნაბიჯებზეც ისაუბრა, რომელიც საქართველომ უნდა გადადგას იმისთვის, რომ მსოფლიოში მიმდიანრე ცვლიელებების ფონზე ქვეყნის ინტერესები იყოს დაცული:

„უნდა ვიყოთ ყურადღებით, გავაუმჯობესოთ და გავაორმაგოთ ჩვენს პარტნიორებთან მუშაობა, რადგან ცოტა გაურკვევლობების პერიოდში, სხვადასხვა პოლიტიკურ ძალებს და ქვეყნებს შესაძლოა გაუჩნდეთ გარკვეული ვაკუუმის და იმის განცდა, რომ ახლა არის დრო იმისთვის, რომ რაიმე ნაბიჯები გადაიდგას არალეგიტიმური ინტერესების დასაკამაყოფილებლად. ამიტომ ჩვენ გვმართებს გარკვეული სიფხიზლე, დიპლომატიური არხებით და ყველა სხვა არხით, რითაც ქვეყნის ინტერესია დასაცავი. ეს ის თემებია, როცა პოლიტიკური სპექტრი უნდა ვიყოთ რაც შეიძლება მოწოდებული, რომ ქვეყნის ინტერესები ყველა ფლანგზე დავიცვათ.“- აღნიშნა დავით უსუფაშვილმა