2016 წლის 13-15 ნოემბერს, სლოვაკეთის რესპუბლიკაში, ბრატისლავაში, ევროკავშირის საპრეზიდენტო "ტროიკის" სპეციალური მოწვევით პარლამენტის ევროპასთან ინტეგრაციის კომიტეტი კოსაკის პლენარულ სხდომაში მიიღებს მონაწილეობას. სხდომაზე წარმოდგენილნი იქნებიან ევროკავშირის ყველა ქვეყნების საპარლამენტო კომიტეტები ევროინტეგრაციის მიმართულებით და ევროკავშირის ინსტიტუტების ხელმძღვანელობა.

ევროკავშირის ერთ-ერთი ყველაზე ძველი და ევროკავშირის ხელშეკრულებებით დაფუძნებული საპარლამენტო პლატფორმა ევროკავშირის ეროვნული პარლამენტების ევროპულ საქმეთა კომიტეტების კონფერენცია - კოსაკი (Conference of Parliamentary Committees for Union Affairs of Parliaments of the European Union – COSAC ) აერთიანებს ევროკავშირის 28 წევრი სახელმწიფოს ეროვნული პარლამენტის ევროპულ საქმეთა კომიტეტებს და ევროპარლამენტს. საპარლამენტო კომიტეტების ეს გაერთიანება 1989 წელს შეიქმნა, რათა გაძლიერებულიყო ეროვნული პარლამენტების როლი ევროკავშირის პოლიტიკის შემუშავებაში.

კოსაკის საშუალებით ეროვნული პარლამენტები ევროკავშირის კანონმდებლობის შემუშავების პროცესში მონაწილეობენ, განიხილავენ ინიციატივებს მოქალაქეთა ცხოვრების ისეთ მნიშვნელოვან სფეროებში, როგორიცაა თავისუფლება, უსაფრთხოება და სამართლიანობა. კოსაკის უნიშვნელოვანესი უფლებამოსილებაა, შეიმუშაოს დასკვნა და დეკლარაცია ევროკომისიის, ევროპარლამენტის და ევროკავშირის საბჭოს საყურადღებოდ. სპეციალიზებული საპარლამენტო კომიტეტების ეს ფორუმი ხელს უწყობს სახელმწიფოებს შორის პოლიტიკური დიალოგის განვითარებას და უზრუნველყოფს ინფორმაციის გაცვლას ევროკავშირის პარლამენტებს შორის.

კოსაკს ხელმძღვანელობს საპრეზიდენტო "ტროიკა" (ევროკავშირის წინა, ახლანდელი და მომავალი თავმჯდომარე ქვეყნის პარლამენტი - ჰოლანდია, სლოვაკეთი, მალტა) და პრეზიდენტ პარლამენტად გვევლინება ევროკავშირის საბჭოს თავმჯდომარე ქვეყნის პარლამენტი, ამჟამად სლოვაკეთის პარლამენტი.