საქართველოს ყოფილი საგარეო საქმეთა მინისტრი გრიგოლ ვაშაძე აშშ-ს საპრეზიდენტო არჩევნებში დონალდ ტრამპის გამარჯვებას აფასებს. მისი განცხადებით, ტრამპს ზედმეტად ბურუსითმოცული საარჩევნო პროგრამა ჰქონდა, მას აქვს მრავალი პროექტი განსახორციელებელი ინაუგურაციის შემდგომ, საქართველოს დრო კი როდის მოვა, ძნელი სათქმელია:

„მე არ მახსოვს, რომ აშშ-ს არჩეულ პრეზიდენტს ასეთი საიდუმლოები და ბურუსითმოცული პროგრამა ჰქონოდეს, ფაქტობრივად შეუძლებელია იმის თქმა, რა საგარეო პოლიტიკა ექნება ბატონი ტრამპის ადმინისტრაციას, შეგვიძლია ჩამოვთვალოთ მხოლოდ ის, რაც ვიცით, რომ საკუთარ ამომრჩეველს დაჰპირდა. უპირველეს ყოვლისა ეს არის სავაჭრო შეთანხმებების და ხელშეკრულებების გაუქმება, ან ახალი მოლაპარაკებების ჩატარება, რომელიც მას მიაჩნია არასამართლიანად შეერთებული შტატებისთვის. ირანთან ხელშეკრულების გადახედვა, საუბარია ირანის ბირთვულ პროგრამაზე. 3 ათას კილომეტრიანი კედლის აშენება მექსიკის საზღვარზე და არალეგალური ემიგრანტების მასობრივი დეპორტაციები შეერთებული შტატებიდან და აგრეთვე ძალიან დიდი სიფრთხილე საკითხზე, რომელიც შეეხება მუსულმანური ქვეყნებიდან ემიგრაციას. ნატოზე, ევროკაშირზე, იაპონიასა და სამხრეთ კორეაზე ბატონ ტრამპს თავის ერთ-ერთ გამოსვლაში ნათქვამი აქვს, რომ მოვიდა დრო, მათ თავიანთი უსაფრთხოებისთვის სახსრები გამოყონ და შესაბამისი ძალისხმევა გამოიჩინონ.

რაც შეეხება ჩვენ რეგიონს, პატიოსნად ვუთხრათ ერთმანეთს 20 იანვარს იქნება ინაუგურაცია, 4 ათასი ვაკანტური ადგილი არის შესავსები ადმინისტრაციაში, აქედან 1000 თანამდებობას სჭირდება სენატში დამტკიცება, ამის შემდგომ 100 დღეში ბატონმა ტრამპმა უნდა მოასწროს უპირველეს ყოვლისა კონგრესში იმფრასტრუქტურული პროექტის პაკეტის გატარება და შემდეგ უნდა მოასწროს ის, რაზეც მტელი რესპუბლიკური პარტია და მისი მხარდამჭერები თანხმდებიან, ეს არის „ობამა ქეარ“ ანუ საყოველტაო, ხელმისაწვდომი სამედიცინო დაზღვევის პაკეტი. ჩვენი დრო როდის მოვა ძალიან ძნელი სათქმელია“, - განაცხადა გრიგოლ ვაშაძემ.