საქართველოს პრეზიდენტმა გადაცემა „არჩევანში“ ქვეყანაშ შექმნილ ეკონომიკურ ვითარებაზე და ეროვნული ვალუტის მდგომარეობაზე ისაუბრა. მარგველაშვილის თქმით საქართველოში ეკონომიკა მძიმე მდგომარეობაშია, არასაკმარისი ტემპით ვითარდება და ეს ასახული იყო წინასაარჩევნო გამოკითხვებშიც სადაც მოსახლეობა მთავარ პრობლემად სწორედ უმუშევრობას და სიღარიბეს თვლიდა:

„ეკონომიკის ზრდის არასაკმარისი ტემპია, იმიტომ რომ ჩვენ ზრდა 2,6% გვაქვს დაგეგმილი 3%-ის ნაცვლად, არც 3% არაა საქართველოსნაირი ქვეყნისთვის კარგი მაჩვენებელი. ამავე ფონზე ჩვენ ვხედავთ რომ დასაქმება არის პრობლემა, ჩემი ყველა ნაცნობი ეძებს სამსახურს, ბევრი საზღვარგარეთ ეძებს, ლარის გაუფასურებამ არა მხოლოდ ბაზარზე იმოქმედა, არამედ დოვლათის შექმნაზე, რეალურად არ გაიზარდა მცირე და საშუალო ბიზნესი, ამ ვითარებაში მოსახლეობას ეს ყოველივე მძიმე ტვირთად დააწვა, ეს აისახა წინასაარჩევნმო გამოკითხვებში, საზოგადოებისთვის ძირითადი პრობლემები იყო უმუშევრობა, ეკონომიკა. ეს ეკონომიკური პარამეტრები ცალკე მოვლენაა, რეალური მოვლენაა, როგორ ვგრძნობთ ჩვენ თავს, სწორედ ესაა რეალური პოლიტიკური გარემო.

ქვეყნის ეკონომიკურ განვითარებაზე პასუხისმგებელი არის მმართველი პარტია და მთავრობა, რომელსაც აქვს ამბიცია რომ ჰყავს ძლიერი ეკონომიკური გუნდი, აქედან გამომდინარე ჩვენ უახლოეს მომავალში უნდა დავინახოთ ნაბიჯები ამ პრობლემის მოსაგვარებლად. ეს არის ის რასაც რეალურად ითხოვს ხალხი, რომელიც საკონსტიტუციო ცვლიებებზე და არჩევის წესზე მნიშვნელოვანია“- განაცხადა გიორგი მარგველაშვილმა. მისი თქმით პრემიერის მიერ წარმოდგენილი ინიციატივები ეკონომიკასთან დაკავშირებით მისთვის მისაღებია და ის ელოდება, როდის მოხდება ამ ინიციატივების განხორციელება რეალობაში.