კვლავ უცნობია თუ როდის შევა 2017 წლის ბიუჯეტის ჩასწორებული ვარიანტი პარლამენტში. ფინანსთა სამინისტროს წარდგენის ვადა გუშინ ამოეწურა. პარალელურად, გაურკვეველია რას გეგმავს ხელისუფლება ეროვნული ვალუტის სტაბილიზაციისთვის. ოპოზიცია ხელისუფლებას ვითარების შესაცვლელად, პირველ რიგში ხარჯების შემცირებისკენ მოუწოდებს.

„მთავრობამ ეს საბიუჯეტო პროცედურები დაარღვია, რა თქმა უნდა პრობლემაა, მაგრამ უმნიშვნელოა იმ პრობლემასთან შედარებით, რასაც ჩვენი ოჯახების გაღარიბება ქვია ამ მავნებლური ეკონომიკური პოლიტიკის გამო. ქვეყანას სჭირდება ბიუჯეტი, სადაც ადმინისტრაციული ბიუროკრატიული ხარჯი არის მკვეთრად შემცირებული, რათა თავიდან ავიცილოთ ბიუჯეტის მაღალი დეფიციტი და შესაბამისად, მდგომარეობის კიდევ უფრო დამძიმება,“ - აცხადებს ენმ-ის წევრი ზურაბ ჭიაბერაშვილი.