უხამსი შინაარსის სტატუსები - რატომ მოხსნეს გორის საგანმანათლებლო რესურს-ცენტრის ხელმძღვანელი?

პოლიტიკა - 20:29, 07 Nov, 2016

6737

გორის საგანმანათლებლო რესურს-ცენტრის ხელმძღვანელი ზურაბ ქარელი თანამდებობიდან გაათავისუფლეს.
ქარელი შიდა აუდიტის დეპარტამენტის დასკვნის საფუძველზე მოხსნეს.
ინფორმაციას განათლების სამინისტროში ადასტურებენ. ბრძანება ზურაბ ქარელს 4 ნოემბერს ჩააბარეს. ის აღნიშნულ თანამდებობაზე ხელისუფლებაში ,,ქართული ოცნების" მოსვლის შემდეგ დაინიშნა.
აღსანიშნავია, რომ ქარელი სოციალურ ქსელში გამოირჩეოდა ოპოზიციური პარტიების განსაკუთრებული კრიტიკით, მან არჩევნების მეორე ტურის შედეგების გამოცხადების შემდეგ “ოცნების” ოპონენტი პარტიის მისამართით უხამსი შინაარსის სტატუსები გამოაქვეყნა.
გახდა თუ არა მისი გათავისუფლების მიზეზი უხამსი შინაარსის კომენტარები ამის გასარკვევად „ნიუპოსტის“ კორესპონდენტი ზურაბ ქარელს დაუკავშირდა. კითხვაზე თუ რატომ გაათავისუფლეს სამსახურიდან ზურაბ ქარელი გვპასუხობს, რომ ეს მინისტრს უნდა ვკითხოთ.

„ფეისბუკზე დაწერილი სტატუსები, ეს არის ჩემი პირადი პიროვნების შეხედულებები და ეს არ არის ოფიციალური რაიმე გვერდი. მე დღესაც ვადასტურებ, რომ „ნაციონალური მოძრაობა“ არის დამნაშავე ორგანიზაცია და ყველა მისი მხარდამჭერი, მათ შორის ჟურნალისტებიც ჩემს თვალში არიან ნაძირალები. ეს არის ძალა რომელმაც საქართველო დაღუპა, ოკუპაციაში ხელი შეუწყო ჩვენს მეზობელ რუსეთს, მისი ყველა მხარდამჭერი ჩემს თვალში არის ნაძირალა და ეს კომენტარები არის ჩემი პირადი შეხედულება და არა როგორც ოფიციალური პირის შეხედულება“-აცხადებს ქარელი.