მიხეილ სააკაშვილის მიერ ოდესის ოლქის ხელმძღვანელის თანამდებობის დატოვებას, უკრაინულ მედიასთან დავით საყვარელიძე აფასებს.

"პრინციპში, ეს გადაწყვეტილება ჩემთვისაც ახალი იყო. მიხეილ სააკაშვილი არაორდინალური და საკმაოდ მაღალი დონის პოლიტიკოსია. პრეზიდენტის ადმინისტრაციას, ძალისხმევის მიუხედავად, არ გამოუვიდა სააკაშვილი განტევების ვაცად გამოეყვანა. სააკაშვილს ნათლად ესმის, რაში მდგომარეობს უკრაინული საზოგადოების მოთხოვნები გაბატონებული უკანონობის ფონზე. ის ყოველთვის საზოგადოების ინტერესებით ხელმძღვანელობდა“ - განაცხადა საყვარელიძემ გამოცემა "ГОРДОН" -თან საუბრისას.

მისი თქმით, მიხეილ სააკაშვილი უკრაინის დატოვებას არ აპირებს .

„სააკაშვილის შემდგომი ქმედებები საერთო ეროვნული ცვლილებებისკენ იქნება მიმართული. აუცილებელია მთელი ტბის გაწმენდა და არა მისი ნაწილის, შეზღუდული შესაძლებლობებით. ის იმ ტიპის ადამიანი არ არის, რომელიც თანამდებობას გამოეკიდება. ვფიქრობ, ეს სწორი გადაწყვეტილბაა, რომელსაც ადრეც ველოდით. მაგრამ ის დარჩა, რათა ყველა შესაძლო რესურსით რამდენიმე პროექტი ბოლომდე მიეყვანა. სამწუხაროდ, ეს არ გამოუვიდა. ყველა ადგილობრივი კლანი ერთად მუშაობს. მათ წინააღმდეგ მოქმედება უბრალოდ შეუძლებელი გახდა. სააკაშვილი არ მიდის უკრაინიდან და შეინარჩუნებს აქტიურ პოლიტიკურ საქმიანობას. თქვენ მალე გაიგებთ ამის შესახებ“ - განაცხადა საყვარელიძემ.

შეგახსენებთ, უკრაინის ოდესის ოლქის ადმინისტრაციის ხელმძღვანელმა მიხეილ სააკაშვილმა გადადგომის შესახებ განცხადება დღეს, სპეციალურად გამართულ პრესკონფერენციაზე გააკეთა.