"სასარგებლო ინსტრუმენტი" ივანიშვილი და ამერიკაში გარდასახული უსუფაშვილი

"სასარგებლო ინსტრუმენტი" ივანიშვილი და ამერიკაში გარდასახული უსუფაშვილი - რა კითხვები აქვს ბერძენიშვილს

პოლიტიკა - 16:26, 07 Nov, 2016

12334

"რესპუბლიკური პარტიის" ლიდერმა დავით ბერძენიშვილმა ინგა გრიგოლიას გადაცემაში „რესპუბლიკელებში“ ბოლო დროს განვითარებულ მოვლენებზე ისაუბრა და განაცხადა, რომ დავით უსუფაშვილის პარტიიდან წასვლა მის ამერიკაში ვიზიტამდე არც კი განიხილებოდა. ბერძენიშვილის თქმით, შესაძლოა უსუფაშვილის გადაწყვეტილებაზე გავლენა თინათინ ხიდაშელმა მოახდინა. ბერძენიშვილის თქმით, ხიდაშელისა და უსუფაშვილის პოლიტიკური ხაზი ერთმანეთს ემთხვეოდა და ისინი ბიძინა ივანიშვილთან უფრო ზომიერი ურთიერთობის მომხრე იყვნენ:

„როდესაც თავისუფალ დემოკრატებს ლიდერები ტოვებდნენ, მე მაშინ მშვიდი სახით ვიძახდი დამარცხებული "რესპუბლიკური პარტიიდან" ლიდერები არ გარბიან-თქო, მაშინ არ ველოდით და არც დათო უსუფაშვილი ელოდა. არსებობს კითხვები საზოგადოებაში და არსებობს კითხვები პარტიაში. ამერიკაში წასვლამდელი უსუფაშვილი იყო "რესპუბლიკურ" პარტიაში ინტეგრირების და სიახლეების მოსურნე და საჯაროდაც ამას ამბობდა, იქიდან დაბრუნდა და გამოგვიგზავნა წერილი, რომ ამჯობინა გაცლოდა. ამერიკაში თინა იყო მაშინ და მემგონი უფრო მნიშვნელოვანი დათოს და თინას შეხვედრა იყო და არა მაინცდამაინც ის რომ ეს ოკეანის გადაღმა მოხდა“- განაცხადა ბერძენიშვილმა.

ბერძენიშვილმა ივანიშვილთან მისი ურთიერთობაზეც ისაუბრა და აღნიშნა, რომ მისთვის ბიძინა ივანიშვილი სასარგებლო ინსტრუმენტს წარმოადგენდა:

„ბიძინა ივანიშვილი იყო სასარგებლო ინსტრუმენტი, მიხეილ სააკაშვილის სახიფათო ავტორიტარული რეჟიმის დასაძლევად და მე მასთან თანამშრომლობას ვუყურებდი, როგორც ამ სასარგებლო ინსტრუმენტის გამოყენებას.“- განაცხადა დავით ბერძენიშვილმა.

ბერძენიშვილის თქმით, საინტერესოა, როგორ იშოვის დავით უსუფაშვილი მისი ახალი პოლიტიკური ძალისთვის ფინანსებს:

„დათო უსუფაშვილმა, ისევე როგორც მე და ვერც სხვა რესპუბლიკელმა ლიდერმა ვერ ვიშოვეთ საერთოდ ვერაფერი ფინანსების თვალსაზრისით ამ არჩევნებისთვის, როგორ იშოვის "რესპუბლიკელობისგან" გათავისუფლებული დათო უსუფაშვილი დიდ ფინანსებს ახალი პარტიის ასაწყობად ესეც საინტერესო იქნება. ბევრი კითხვის ნიშანი არის.“- განაცხადა ბერძენიშვილმა.