რიტუალურ მკვლელობაში ბრალდებული ხუთივე პირი სასამართლომ წინასწარ პატიმრობაში დატოვა

პოლიტიკა - 16:19, 06 Nov, 2016

1860

რიტუალურ მკვლელობაში ბრადლებულ ხუთივე პირს საქალაქო სასასამართლომ აღმკვეთ ღონისძიებად პატიმრობა შეუფარდა.

აღნიშნულ საქმეზე განზრახ დამამძიმებელ გარემოებაში მკვლელობისთვის დაკავებულ ბრალდებულთაგან ორი - ჩადენილ დანაშაულს აღიარებს.

გარდაცვლილი ქალბატონის შვილის ადვოკატი აცხადებს, რომ მისი დაცვის ქვეშ მყოფი ბრალს აღიარებს. გაგა მეშველიანი ამბობს, რომ დედა-შვილს ოჯახური უთანხმოება ჰქონდათ, თუმცა ამას რიტუალთან კავშირი აქვს თუ არა, ადვოკატისთვის უცნობია.

მესამე ბრალდებული, არასრულწლოვანი ნინა ჩ. დუმილის უფლებას იყენებს. ერთ-ერთი ბრალდებულის ადვოკატმა ნიკა სადრაძემ განაცხადა, რომ მისი დაცვის ქვეშ მყოფი პირი არ არის ბრალდებული მკვლელობაში, არამედ არის დანაშაულის შეუტყობინებლობაში ბრალდებული. შესაბამისად, ის აღნიშნულ გადაწყვეტილებას სააპელაციო სასამართლოში გაასაჩივრებს.

შემდეგი სასამართლო პროცესი 8 დეკემბერს გაიმართება.

შეგახსენებთ, რომ შსს-ს თბილისის პოლიციის დეპარტამენტისა და საქართველოს პროკურატურის თანამშრომლებმა, ერთობლივად ჩატარებული ოპერატიულ–სამძებრო და საგამოძიებო ღონისძიებების შედეგად, 1997 წელს დაბადებული ირმა ყ., 1993 წელს დაბადებული ბექა შ. და 1999 წელს დაბადებული ნინა ჩ. დამამძიმებელ გარემოებაში ჯგუფურად ჩადენილი განზრახ მკვლელობისთვის, ხოლო 1994 წელს დაბადებული ავთანდილ ა. და 1993 წელს დაბადებული დათა კ. - ამავე მკვლელობის შეუტყობინებლობისა და დანაშაულის დაფარვის ბრალდებით დააკავეს.

გამოძიება დამამძიმებელ გარემოებაში ჯგუფურად ჩადენილი განზრახ მკვლელობის, განზრახ მკვლელობის, დანაშაულის დაფარვისა და დანაშაულის შეუტყობინებლობის ფაქტზე, საქართველოს სისხლის სამართლის კოდექსის 108-ე, 109-ე მუხლის მე-2 ნაწილით, 375-ე და 376-ე მუხლებით მიმდინარეობს", - ნათქვამია შსს-ს განცხადებაში.