მმართველი გუნდი კონსულტაციების აქტიურ ფაზაშია სამტავრობო ცვლილებებთან დაკავშირებით. „ქართული ოცნების“ აღმასრულებელი მდივანი აცხადებს, რომ ჯერჯერობით გადაწყვეტილი არაფერი არ არის, პარლამენტის შიგნით კი უნდა ჩამოყალიბდეს პოლიტიკურ სუბიექტებს შორის ისეთი ურთიერთობა, რომელიც წაადგება ქვეყანაში დემოკრატიული პროცესების განვითარებას:

„ჯერჯერობით გადაწყვეტილი არაფერი არ არის, გრძელდება კონსულტაციები, განიხილება კონკრეტული კანდიდატურები კონკრეტულ თანამდებობებზე და უახლოეს დღეებშ მიიღება გადაწყვეტილებები. მნიშვნელოვანია, რომ მომდევნო ოთხი წლის განმავლობაში, პარლამენტმა მნიშვნელოვანი წვლილი შეიტანოს პოლიტიკური სისტემის კონსოლიდაციის საქმეში და ამ კუთხით პარლამენტის თავმჯდომარეს რა თქმა უნდა განსაკუთრებული როლი ეკისრება. პარლამენტის შიგნით უნდა ჩამოყალიბდეს პოლიტიკურ სუბიექტებს შორის ისეთი ურთიერთობები, რომლებიც მაქსიმალურად წაადგება დემოკრატიული პროცესების განვითარებას“, - განაცხადა ირაკლი კობახიძემ.