"ნაციონალური მოძრაობის" წევრები ცენტრალურ ოფისში იკრიბებიან

პოლიტიკა - 18:46, 04 Nov, 2016

1205

"ნაციონალური მოძრაობის" პოლიტსაბჭოს წევრები, ლიდერები, ახალი სახეები პარტიის ოფისში იკრიბებიან.

ჟურნალისტების მთავარი კითხვაა უნდა აირჩიოს თუ არა ახალი თავმჯდომარე პოლიტსაბჭომ?

დღეს ამ საკითხზე დავით ბაქრაძემ კომენტარი არ გააკეთა. გიგა ბოკერიას პოზიცია კი უკვე ცნობილია.

"ზოგადად და ამ შემთხვევაში გიგი უგულავას განცხადებებს ვიზიარებ"- თქვა ბოკერიამ. ელენე ხოშტარიაც უგულავას პოზიციაზეა.

პარტიის თავმჯდომარის პოსტის ვაკანტურობას რაც შეეხება, როგორც ენმ -ს ლიდერები აცხადებენ, ეს ფაქტი მიხეილ სააკაშვილის პოლიტდევნილობის მიზეზით აიხსნება.

„პარტიას რომ სჭირდება არაციხეში მჯდომი, არადევნილობაში მყოფი კონკრეტული ადამიანები ეს ცხადია, ოღონდ მნიშვნელოვანია, მათი აზრი, ვინც დევნილობასა და ციხეშია, იყოს გათვალისწინებული, მთავარი არის ერთიანობა,“- განაცხადა გიორგი ბარამიძემ.

თინათინ ბოკუჩავა მიიჩნევს, რომ მთავარია პარტიას სწორი სტრატეგია ჰქონდეს.

„მიხეილ სააკაშვილი თავმჯდომარის პოზიციას აღარ იკავებს უკვე დიდი ხანია, იქიდან გამომდინარე, რომ თეა წულუკიანმა ივანიშვილის დავალებით მას საქართველოს მოქალაქეობა წაართვა და ის იმყოფება უკრაინაში პოლიტიკურ დევნაში. თანამდებობები და პოზიციები არ არის მთავარი, ჩვენთვის მთავარია სწორი სტრატეგია გვქონდეს ჩვენი პარტიის წინსვლისთვის. დარწმუნებული ვარ, რომ დემოკრატული გადაწყვეტილებების შედეგად, ჩვენ ამ პარტიას წინ წავიყვანთ,“- განაცხადა თინათინ ბოკუჩავამ.

დავით კირკიტაძის თქმით, სხვა უფრო მნიშვნელოვანის საკითხებია გადასაწყვეტი, ვიდრე თავმჯდომარის არჩევის თემა.

„პარტიას დღეს სხვა რამე სჭირდება, სჭირდება გაერთიანება და სტრატეგიის დასახვა, როგორ მოვიშოროთ ბიძინა ივანიშვილი,“- განაცხადა დავით კირიკიტაძემ.