"ძალიან ცდება თუ ვინმეს აქვს ილუზია, რომ ჩვენ ოკუპაციას შევეგუებით"- ფხალაძე კარასინის განცხადებაზე

პოლიტიკა - 15:11, 04 Nov, 2016

1694

საქართველოს პრეზიდენტის საგარეო ურთიერთობათა მდივანმა გრეგორი კარასინის განცხადებასთან დაკავშირებით კომენტარი გააკეთა. თენგიზ ფხალაძის განცხადებით საქართველო არასოდეს შეეგუება ქვეყნის ტერიტორიების ოკუპაციას და საერთაშორისო ასპარეზზე იბრძოლებს იმისთვის, რომ ოკუპანტების არალეგიტიმურ ქმედებებს, რომელიც მიმართულია ქართული სახელმწიფოებრიობის წინააღმდეგ საერთაშორისო შეფასებები მიეცეს. ფხალაძე რუსეთ-აფხაზეთს შორის გაფორმებულ ხელშეკრულებასაც შეეხო.

„საქართველოს ხელისუფლებას აქვს არჩეული ის დიპლომატიური და სტრატეგიული მოთმინების გზა, რომელიც მიზნად ისახავს ჩვენთვის ურთულესი პრობლემების მოგვარებას დიპლომატიური გზით, საერთაშორისო მექანიზმებით და მაქსიმალურად შერბილებას და თავიდან არიდებას იმ საფრთხეებისა, რომელიც აქვს საქართველოს. მაგრამ თუ ვინმეს აქვს იმის ილუზია, რომ საქართველოს ხელისუფლება ან ქართველი ხალხი ოდესმე შეეგუება იმ ნაბიჯებს, რომელიც მაგალითად გადაიდგა გუშინ, რომელიც კიდევ ერთი დადასტურებაა მცოცავი ოკუპაციისა და ანექსიისა, რომელსაც რუსეთის ფედერაცია ახორციელებს საქართველოს ტერიტორიაზე. თუ ვინმეს აქვს იმის ილუზია რომ ჩვენ ამას შევეგუებით ძალიან ცდება. მთელი ჩვენი ძალისხმევა მიმართულიადა ყოველთვის იქნება მიმართული იქითკენ, რომ საქართველოს თემატიკა და ჩვენთვის მტკივნეული საკითხები ყოველთვის მაქსიმალურად იყოს წამოწეული საერთაშორისო თანამეგობრობის დღის წესრიგში და იმ არალეგიტიმურ ქმედებებს, რომელიც მიმართულია ქართული სახელმწიფოებრიობის წინააღმდეგ, მიეცეს საერთაშორისო შეფასებები. საბოლოო ჯამში ეს პოლიტიკა აუცილებლად მიგვიყვანს ქვეყნის დეოკუპაციისა და გამთლიანებისაკენ“- განაცხადა თენგიზ ფხალაძემ.