"პარტიის ხელმძღვანელობის განახლება მოგვიწევს" - ჭიაბერაშვილი უგულავას ეთანხმება

პოლიტიკა - 14:08, 04 Nov, 2016

1987

”ნაციონალური მოძრაობის” ერთ-ერთი ლიდერი ზურაბ ჭიაბერაშვილი გიგი უგულავას წერილის იმ ნაწილს გამოეხმაურა, სადაც თბილისის ყოფილი მერი ”ნაციონალურ მოძრაობაში” ახალი თავმჯდომარის არჩევის საკითხზე საუბრობს.
როგორც ჭიაბერაშვილი ამბობს, პარტიას ხელმძღვანელობის განახლება მოუწევს. ენმ-ს ერთ-ერთი ლიდერის თქმით, საქართველოს კანონმდებლობით მიხეილ სააკაშვილი ვერც იქნება პოლიტიკური პარტიის თავმჯდომარე.
”როგორც გიგი უგულავას პატიმრობა არის პოლიტიკური ნიშნით, ისე მიხეილ სააკაშვილის დევნილობაში ყოფნა არის პოლიტიკური ნიშნით და ბიძინა ივანიშვილის პირადი სურვილი. მიხეილ სააკაშვილი, იმის გამო, რომ მას ჩამოართვა მოქალაქეობა ივანიშვილის რეჟიმმა, საქართველოს კანონმდებლობით ვერც იქნება პოლიტიკური პარტიის თავმჯდომარე და ფორმალურად არც არის პარტიის თავმჯდომარე. ეს არის რეალობა, რომლის წინაშეც დაგვაყენა ივანიშვილმა"- აღნიშნა ჭიაბერაშვილმა.
და იქვე აღნიშნა, რომ თავად მიხეილ სააკაშვილიც საუბრობს ერთ-ერთ მოწოდებაში, რომ ენმ-ს სჭირდება იმის გააზრება თუ როგორ იაროს პარტიამ წინ.
"ბუნებრივია, ჩვენ მოგვიწევს პარტიის ხელმძღვანელობის განახლება. ამაზე იმსჯელებს პარტიის ხელმძღვანელი ორგანოები, პოლიტსაბჭო, ეს საკითხი დაისმება ყრილობაზე და პარტია მიიღებს გადაწყვეტილებას”, - განაცხადა ჭიაბერაშვილმა.

რაც შეეხება უგულავას, ჭიაბერასვილის თქმით, მისი მოსაზრებები ძალიან საინტერესოა.

"გიგი უგულავა პოლიტპატიმარია, პოლიტდევნილი ბიძინა ივანიშვილის რეჟიმის მიერ და მისი მოსაზრებები როგორ წარმოუდგენია მას ქვეყანაში შექმნილი მდგომარეობა, ქვეყნის მომავალი და მათ შორის რა სტრატეგიით უნდა იმოქმედოს ”ნაციონალურმა მოძრაობამ”, ფრიად საყურადღებოა"- თქვა ჭიაბერაშვილმა.