პრეზიდენტის არჩევის წესთან დაკავშირებით დაწყებულ დისკუსიას პრეზიდენტის ადმინისტრაციის ხელმძღვანელი გამოეხმაურა. გიორგი აბაშიშივილის თქმით ამ თემის გაჟღერება „ქართული ოცნების“ ერთ-ერთი ლიდერის მხრიდან ჯერ კიდევ პირველი ტურის დასრულებისთანავე მოხდა.

„ქართულ ოცნებას აქვს საკონსტიტუციო უმრავლესობა და მათ წინაშე დგას დილემა - რაში გამოიყენონ. პირველ რიგში მოდით დავაყენოთ საკითხი ასე, რისთვის მიანიჭა საზოგადოებამ მანდატი „ქართულ ოცნებას“, იმისათვის, რომ ასეთ უტოპიურ თემებზე ესაუბრა თუ იმისათვის რომ უმუშევრობა დაეძლია, უკეთესი ჯანდაცვა , განათლება და ა.შ ყოფილიყო? ეს არის სრულიად აბსურდული თემა და ამ აბსურდულ თემაზე ამდენი ადამიანი მსჯელობს. შეგნებულად ვიკავებდით ამაზე თავს. მთავარი კითხვა მაქვს , ამ საკითხის გარდა ყველა საკითხი მოგვარებულია და ესღა დაგვრჩა? როდესაც რაღაცის ცვლილებას ვგეგმავთ, ხომ ის უნდა განვსაზღვროთ რატომ არის ეს ცვლილება საჭირო? დღემდე ვერ მოვისმინეთ წონადი არგუმენტი იმისა თუ რატომაა ეს საჭირო. თუ ვინმეს ჰგონია, რომ პრეზიდენტის არჩევის ცვლილება ნომერ პირველი საკითხია, მაშინ სერიოზული დისკუსია შეუძლებელია.“- განაცხადა გიორგი აბაშიშვილმა.

პრეზიდენტის ადმინისტრაციის ხელმძღვანელის განცხადებით პრეზიდენტის ინსტიტუტი თავის ფუნქციას წარმატებით ასრულებდა და ბევრი საკითხი სწორედ პრეზიდენტის ჩარევით გადარჩა, მათ შორის მოსმენების და ეროვნული ბანკის შესახებ კანონები.

„პრეზიდენტის ინსტიტუტი წარმატებით ფუნქციონირებს , არის მთავარი ბალანსის შემქმნელი ხელისუფლების შტოებს შორის, პრეზიდენტის ინსტიტუტის საშუალებით მრავალი საკითხი გადარჩა ამ ქვეყანაში, რომელიც შეიძლება საერთოდ არ გვქონოდა ან გვქონოდა მახინჯი ფორმით. რომ არ ყოფილიყო პრეზიდენტის ინსტიტუტის ჩართულობა, რა იქნებოდა მოსმენების კანონთან, ეროვნულ ბანკთან დაკავშირებით ? სადაც პრობლემა არ არსებობს რატომ ვიწყებთ იქიდან?“- აღნიშნა აბაშიშვილმა.

გიორგი აბაშიშვილის თქმით პრეზიდენტის ინსტიტუტზე შეტევა ხდება იმისთვის, რომ ამ განცხადებებით ვინმემ ვინმეს ასიამოვნოს:

„თუ არა ცალკეული ახირებები, რომ ვინმემ ვინმეს ასიამოვნოს და პრეზიდენტის ინსტიტუტზე და პრეზიდენტზე რაიმე თქვას, სხვა რეალური მიზეზი აქ არ არსებობს.“ - განაცხადა აბაშიშვილმა.