„ქართული ოცნების“ ცენტრალურ ოფისში თანამდებობების გადანაწილებაზე მსჯელობენ

პოლიტიკა - 17:22, 01 Nov, 2016

4343

„ქართული ოცნების“ ცენტრალურ ოფისში კონსულტაციები მიმდინარეობს. კონსულტაციებში საქართველოს პრემიერ-მინისტრი, აღმასრულებელი ხელისუფლების წარმომადგენლები და პარლამენტარები მონაწილეობენ. ჯერჯერობით უცნობია კონკრეტული თემები რაზეც მმართველი გუნდის წარმომადგენლები მსჯელობენ, თუმცა გავრცელებული ინფორმაციით საკითხი საპარლამენტო და აღმასრულებელი თანამდებობების გადანაწილებას ეხება.

ჟურნალისტებთან ზოგადი კომენტარები მმართველი გუნდის რამდენიმე წევრმა გააკეთა. გია ჟორჟოლიანი და დიმიტრი ხუნდაძე პარლამენტის თავმჯდომარის პოსტზე ირაკლი კობახიძის არჩევას უჭერენ მხარს.

„კონსულტაციები იქნება ფორმალურიც, არაფორმალურიც და საბოლოოდ რაღაცა სახეს მიიღებს. 19-ში იქნება ალბათ პარლამენტის პირველი სხდომა.“- განაცხადა გია ჟორჟოლიანმა, ის ირაკლი კობახიძის პარლამენტის თავმჯდომარედ შესაძლო დანიშვნის საკითხსაც შეეხო და კობახიძე, თანამდებობისთვის კომპეტენტურ და კვალიფიციურ ადამიანად დაახასიათა.

ირაკლი კობახიძის კანდიდატურას ერთმნიშვნელოვნად მხარს უჭერს დიმიტრი ხუნდაძეც:

„კონსულტაციები მიმდინარეობს მე მასში მონაწილეობას არ ვიღებ, მაგრამ ჩემი მხარდაჭერა მას ერთმნიშვნელოვნად ექნება. რაც შეეხება მთავრობაში საკადრო ცვლილებებს, ეს არის პრემიერის პრეროგატივა და მე არანაირი სურვილი არ მაქვს ამ ნაწილში ჩავენაცვლო, მე გადაწყვეტილებას მხარს დავუჭერ.“- განაცხადა ხუნდაძემ. ჯანმრთელობის დაცვისა და სოციალურ საკითხთა კომიტეტის ყოფილი თავმჯდომარე ადასტურებს, რომ მან შესაძლოა ისევ იგივე პოსტზე გააგრძელოს მუშაობა.