"უნდა ვყოფილიყავით მეორე სახელისუფლებო პარტია და არა ოპოზიცია"- ზაქარეიშვილი "რესპუბლკელების" დატოვების მიზეზებზე საუბრობს

პოლიტიკა - 13:07, 01 Nov, 2016

2929

შერიგებისა და სამოქალაქო თანასწორობის საკითხებში ყოფილი სახელმწიფო მინისტრი "რესპუბლიკური პარტიიდან" წასვლის მიზეზებზე ალაპარაკდა.
ზაქარეიშვილის თქმით, მისი პოზიციაა, "რესპუბლიკური პარტია" ყოფილიყო მეორე სახელისუფლებო პარტია და არა ოპოზიციური ძალა, - როგორც ზაქარეიშვილი ამბობს, სწორედ ეს მოსაზრება გახდა გუნდში აზრთასხვადასხვაობის მიზეზი.
"ჩემი ხედვები, თუ როგორი სტრატეგიით უნდა ემოქმედა "რესპუბლიკურ პარტიას" კოალიციაში ყოფნისას არ ემთხვეოდა პარტიის ძირითად სტრატეგიას. ჩემი პოზიცია იყო, რომ რაკი ვიყავით ხელისუფლებაში, უნდა ვყოფილიყავით ბოლომდე ხელისუფლებაში და ყველა პრობლემა შიგნით უნდა ყოფილიყო განხილული. ბევრი მეთანხმებოდა, მაგრამ ზოგიერთი რომ არ მეთანხმებოდა, ეს იწვევდა გარკვეულ დისკომფორტს, ვიდრე არ აღმოჩნდა, რომ მე ვიყავი უმცირესობაში. ძალიან მკაფიოდ და ცხადად დავაყენე მე საკითხი საგარეჯოს შუალედური არჩევნების დროს. მაშინ უფრო გამოიკვეთა პოზიციების პოლარიზაცია.
დავსვი საკითხი - თანამშრომლობისკენ მივდივართ თუ კონფრონტაციისკენ მივდივართ, ვართ თუ არა მეორე სახელისუფლებო პარტია თუ ვართ უფრო ოპოზიცია. "რესპუბლიკური პარტიის" მარცხმა ჩემი პოზიციის სისწორე დაადასტურა. ამ დაპირისპირებით და ამ ვითომ ოპოზიციონერობით საზოგადოება საერთოდ დავაბნიეთ. საზოგადოება ვერ მიხვდა, ბოლოს და ბოლოს ჩვენ ოპოზიცია ვიყავით, თუ ხელისუფლება ვიყავით. კოალიციაში დარჩენა- არ დარჩენამდე არ უნდა მისულიყო საქმე. უნდა ვყოფილოყავით კოალიციის ორგანული სხეული",- განაცხადა პაატა ზაქარეიშვილმა.

"ნიუპოსტთან" საუბრისას კი ზაქარეიშვილმა აღნიშნა, რომ ის ამ საკითხზე დამაებით განმარტებებს არ გააკეთებს. ყოფილმა ჩინოსანმა არც მის სამომავლო გეგმებზე დასმულ კითხვას უპასუხა.