თბილისის საკრებულოს თავმჯდომარემ მოსახლეობას გაწეული მუშაობის შესახებ ანგარიში ჩააბარა

პოლიტიკა - 10:06, 01 Nov, 2016

1370

თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა 2016 წელს გაწეული მუშაობის შესახებ ანგარიში წარადგინა.

პრეზენტაცია საკრებულოს დიმიტრი ყიფიანის სახელობის სხდომათა დარბაზში გაიმართა.

საკრებულოს თავმჯდომარემ დამსწრე საზოგადოებას 2016 წლის საპარლამენტო არჩევნების დასრულება მიულოცა და პროცესის გამჭვირვალეობასა და დემოკრატიულობას გაუსვა ხაზი.

საკრებულოს თავმჯდომარემ მოხსენება საანგარიშო პერიოდში ჩატარებულ სხდომებზე და ბიუროებზე მუშაობის შედეგად მიღებული მნიშვნელოვანი გადაწყვეტილებების მიმოხილვით განაგრძო, საკრებულოში 2016 წელს ჩატარებული მუშაობის ანგარიშში მოხვდა დედაქალაქისთვის მნიშვნელოვანი პროექტები, მათ შორის დედაქალაქის გარემოსდაცვითი სტრატეგია, ჯანმრთელობის და სოციალური დაცვისა და 13 ივნისის სტიქიის შედეგად დაზარალებული მოსახლეობის დახმარების პროგრამები.

"საგანგებო ყურადღება გამახვილდა პროექტებზე, რომლებიც ქალაქის განვითარებას უკავშირდება. არა მხოლოდ ურბანული, არამედ ჯანმრთელობის, სპორტული ღონისძიებების, კულტურულ-საგანმანათლებლო და სხვა საკითხებთან დაკავშირებით. ვფიქრობთ, რომ ჩვენი ამ მიმართულებით მუშაობა გაგრძელდება," - განაცხადა გიორგი ალიბეგაშვილმა.

საკრებულოს თავმჯდომარის ანგარიშს საკრებულოს წევრები, საკრებულოს თავმჯდომარესთან და განათლებისა და კულტურის კომისიასთან არსებული სათათბიროს წევრები, მაჟორიტარი დეპუტატების ბიუროს წარმომადგენლები და მოქალაქეები ესწრებოდნენ.