ჯერ ქართული საზოგადოება სოციალურ ქსელში განთავსებულმა ბებიაზე ბოროტად შეხუმრებული შვილიშვილების ვიდეომ აღაშფოთა, შემდეგ პირდაპირ ეთერში რამდენიმე თვის ბავშვის ისტერიკულმა ტირილმა, რომელსაც მონდომებული უფროსები აკავებდნენ, რომ ყური გაეხვრიტათ.

„ეს არის ძალადობა“, „სადიზმი“ „სადისტები ხართ“, „სამარცხვინოები“, „ავადმყოფები“ „გააფრინეთ?“ - ამგვარი შეფასება ორივე ფაქტს მოჰყვა.

„ისინი კი არა, ჩვენ ვაფრენთ, გიჟების ქვეყანა ვართ, ჩვენ ყველა ვაფრენთ“ - აკეთებს დასკვნას ნათია ფანჯიკიძე.

ნათია ფანჯიკიძე: „დღეს ძირითადად "დახვრეტებს" ვაზიარებ, შვილიშვილები ბებიას დასდევენ თოფით, აგერ თვეების ბავშვს აკავებენ, რომ დაუბრკოლებლად "ესროლონ", მოკლედ, მეგობრებო, მიკიბვ-მოკიბვას აზრი არა აქვს, პირდაპირ უნდა გითხრათ სიმართლე, - ჩვენ ვაფრენთ, კარგად გაისიგრძეგანეთ, "ისინი" კი არა, არამედ ჩვენ, ყველა ვაფრენთ.

განზრახვა ცალ-ცალკე არავის ჰქონია ბოროტი, არც წამყვანებს, არც "თოფიანებს" და მითუმეტეს არც დედას, გიჟების ქვეყანა იმიტომ ვართ, რომ მოხვევა არ შეგვიძლია, რომ არ წარიმართა სცენარი მშვიდობიანად, ბავშვი რომ შეშინდა და ატირდა, ხომ შეიძლება ამ დროს მიიღო სწრაფად აზროვნებაში სიგნალი, დააკლიკო ტვინში და შეჩერდე ?!“