ესტონეთის რესპუბლიკაში საქართველოს ელჩი საქართველოს რეგიონული მაუწყებლების დელეგაციის წევრებს შეხვდა

პოლიტიკა - 13:00, 31 Oct, 2016

1082

ესტონეთის რესპუბლიკაში საქართველოს საელჩოში გაიმართა შეხვედრა საქართველოს რეგიონული მაუწყებლების დელეგაციის წევრებთან, რომლებიც ესტონეთში ვიზიტით იმყოფებოდნენ.

შეხვედრაზე საქართველოს საგანგებო და სრულუფლებიანმა ელჩმა თეა ახვლედიანმა ისაუბრა რეგიონული მაუწყებლების დონეზე ესტონეთის ევროინტეგრაციის პროცესის გაცნობისა და კომუნიკაციის თვალსაზრისით გამოცდილების გაზიარების მნიშვნელობაზე. ელჩმა ჟურნალისტებს მიაწოდა ინფორმაცია საელჩოს საქმიანობისა და პრიორიტეტების შესახებ და ისაუბრა როგორც ორმხრივ ურთიერთობებზე, ასევე ევროინტეგრაციის მიმდინარე პროცესსა და საქართველოს მიერ მიღწეულ შედეგებზე.

ელჩმა მიმოიხილა საქართველო-ესტონეთის ორმხრივი თანამშრომლობის ფართო სპექტრი. განსაკუთრებული ყურადღება გაამახვილა ისეთ მიმართულებებზე, როგორიცაა: ელექტრონული მმართველობა; საინფორმაციო და კომუნიკაციების ტექნოლოგიები; კიბერუსაფრთხოება; ინოვაციები და სტარტაპები; კრეატიული ინდუსტრიების განვითარება და სხვ. აღინიშნა, რომ ორმხრივი თანამშროლობა, განსაკუთრებით დარგობრივი მიმართულებებით, ძირითადად ეხმიანება საქართველოს მიერ ასოცირების შესახებ შეთანხმების განხორციელების მიზნებს.

ელჩმა ასევე ისაუბრა ესტონეთის მტკიცე მხარდაჭერაზე საქართველოს ნატო-ში გაწევრიანების, ევროინტეგრაციის და ტერიტორიულ მთლიანობასა და სუვერენიტეტის მიმართ.

საქართველოს რეგიონული მაუწყებლების დელეგაციის ვიზიტი ესტონეთში „აღმოსავლეთ პარტნიორობის ცენტრის“ ორგანიზებითა და ესტონეთის საგარეო საქმეთა სამინისტროს “განვითარების თანამშრომლობის“ ფინანსური მხარდაჭერით შედგა. ვიზიტი პროექტის „საქართველოს რეგიონულ მაუწყებელთა უნარ-ჩვევების განვითარება ახლებური მიდგომებით“ ფარგლებში განხორციელდა.

აღნიშნული პროექტი გულისხმობს საქართველოს სხვადასხვა რეგიონულ მაუწყებელთა 4 ჯგუფის ვიზიტს ესტონეთში, რომლის ფარგლებშიც გათვალისწინებულია შეხვედრების გამართვა ესტონელ კოლეგებთან, ვიზიტები ესტონეთის სხვადასხვა რეგიონში, პრაქტიკული სასწავლო სესიები, გამოცდილების გაზიარება და კავშირების დამყარება ესტონელ მაუწყებლებთან.