"შს მინისტრი შეიცვლება... არ მგონია მისდამი დიდი ნდობა ჰქონდეთ"- გელბახიანი 5 ახალ მინისტრს პროგნოზირებს

პოლიტიკა - 13:05, 31 Oct, 2016

15551

იურისტი ვალერი გელბახიანი გაზეთ „ალიასთან“ საუბარში, მომავალი მთავრობის დაკომპლექტებაზე საუბრობს და აცხადებს, რომ მოსალოდნელია სამინისტროების შემცირება. ექსპერტის აზრით მთავრობაში დაახლოებით 5 ახალი მინისტრი იქნება, შეცვლას კი შინაგან საქმეთა, ფინანსთა, საგარეო და კულტურის მინისტრებს უწინასწარმეტყველებს. როგორც გელბახიანი აცხადებს, საკვანძო თანამდებობას დაიკავებს კახა კალაძე, ერთ-ერთ ვარიანტად კი გელბახიანი პარლამენტის თავმჯდომარის პოსტს განიხილავს:

„რაც შეეხება იმას, ინ იქნება პარლამენტის თავმჯდომარე, თუ ლოგიკურად ვიმსჯელებთ, საპარლამენტო არჩევნებს ხელმძღვანელობდა კახა კალაძე. როგორც წესი, ასეთი ორგანიზატორული ფუნქციის მატარებელი პოლიტიკოსი, როგორც ყოველთვის. არჩევნების შემდეგ იკავებს ძალიან მაღალ საკვანძო თანამდებობას მთავრობაში. არ გამოვრიცხავ, კალაძე გახდეს პარლამენტის თავმჯდომარე, პრემიერი კვლავ გიორგი კვირიკაშვილი იქნება. არა მგონია, მისი შეცვლა „ქართული ოცნებისთვის“ პოზიტიური იყოს, ამ წუთში ვერ ვხედავ ისეთ ადამიანს, რომელიც კვირიკაშვილს ჩაანაცვლებს. ვფიქრობ შინაგან საქმეთა მინისტრი შეიცვლება, მღებრიშვილი კი არის „ქართული ოცნების“ კადრი , მაგრამ არა მგონია, მისდამი დიდი ნდობა ჰქონდეთ. „ქართული ოცნების“ ლიდერებს. ხელშეუხებელი დარჩება თავდაცვის მინისტრი, ჩვენ გვაქვს საერთაშორისო ვალდებულებები აღებული და არასერიოზულად აღიქმება ამ სფეროს მინისტრების ხშირი ცვლა. რაც შეეხება ეკონომიკურ ბლოკს , ალბათ, ფინანსთა მინისტრი ხადური გამოიცვლება. ვფიქრობ, რომ კულტურის მინისტრი, საგარეო საქმეთა მინისტრები შეიცვლებიან, დაახლოებით 5 ახალი მინისტრი გვეყოლება და თუ მოხდება სამინისტროების გაერთიანება, უნდა ვივარაუდოთ, რომ ეკონომიკისა და ინფრასტრუქტურის სამინისტროები გაერთიანდება, შეიძლება კულტურის და განათლების სამინისტროც შეერწყას, დაახლოებით 14 სამინისტრო დარჩება. ჩემი აზრით, ძალიან საინტერესო ამბები გველის“- განაცხადა ვალერი გელბახიანმა.