არჩევნებში გამოვლენილ დარღვევები - საიას შემაჯამებელი ბრიფინგი

პოლიტიკა - 12:24, 31 Oct, 2016

1190

ახალგაზრდა იურისტთა ასოციაციის დამკვირვებლებმა ხმის დათვლის პროცესში განსხვავებული ფორმით ხმის მიცემის 80-მდე შემთხვევა დააფიქსირეს.

საიას თავმჯდომარის ანა ნაცვლიშვილის შეფასებით, ადგილი ჰქონდა დამკვირვებლებისთვის ხელისშეშლის, მუქარის და სხვა უფლებების შეზღუდვის ფაქტებს. ნაცვლიშვილმა სხვა დარღვევებზეც ისაუბრა, თუმცა მისი შეფასებით საერთო ჯამში, 2016 წლის საპარლამენტო არჩევნების მეორე ტურმა მშვიდ გარემოში ჩაიარა.

ნაცვლიშვილმა ასევე გაამახვილა ყურადღება რამდენიმე დღის წინ გავრცელებულ ინფორმაციაზე, რომელიც მმართველი გუნდის მიერ სახელმწიფო დაწესებულებებში მომუშავე ადამიანებისთვის ხმის განსხვავებული ფორმით მიცემის დავალებას ეხებოდა.

"თქვენ გახსოვთ, რომ ჩვენ 29 ოქტომბერს გავავრცელეთ განცხადება, ჩვენთვის მოწოდებული ინფორმაციის თაობაზე, რომელიც საუბრობდა, რომ სხვადასხვა საჯარო უწყებებში, ასევე სკოლებში და ბაღებში დასაქმებულ ადამიანებს ჰქონდათ მითითება, რომ განსხვავებული ფორმით დაეფიქსირებინათ თავიანთი ნება. ქართულმა ოცნებამ უარყო მსგავსი მითითების გაგზავნა, თუმცა ჩვენი დამკვირვებლები ხმების დათვლის პროცესში განსაკუთრებით აკვირდებოდნენ, რამდენად დაფიქსირდებოდა განსხვავებული ფორმით ხმის მიცემა. იმ უბნებზე, სადაც საიას დამკვირვებლები იყვნენ წარმოდგენილი და ასეთი იყო 300-მდე უბანი, ჩვენ დავაფიქსირეთ 80-მდე შემთხვევა განსხვავებული ფორმით არჩევანის გაკეთებით, რომელიც გამოიხატებოდა ოთხკუთხედად ან სამკუთხედად შემოხაზულ არჩევანში. ასევე 40-მდე შემთხვევა ხმის მიცემის ფარულობის დარღვევის,“ - განაცხადა ანა ნაცვლიშვილმა.