ერთიანი ნაციონალური მოძრაობა მარნეულის #36 ოლქის შედეგების გაუქმებას მოითხოვს. როგორც ოპოზიციაში აცხადებენ, მარნეულში არჩევნები გაყალბდა.

ერთიანი ნაციონალური მოძრაობას ერთ-ერრთ მტკიცებულებად ახალი ვიდეო-ჩანაწერი მოჰყავს რომელშიც, მათი ინფორმაციით, ასახულია ქართული ოცნების წარმომადგენელი, რომელიც ყვება, თუ როგორ ჩაყარა 400 ბიულეტენი საარჩევნო ყუთში ქართული ოცნების სასარგებლოდ მაშინ, როდესაც ქართულ ოცნებას რეალურად 80 ხმა ჰქონდა.

”ეს არჩევნები უნდა გაუქმდეს, ვინაიდან არჩევნები მიმდინარეობდა გაყალბების, დაშინებისა და დარღვევების ფონზე. არჩევნებმა არ ასახა ამომრჩევლის ნება და აქედან გამომდინარე 36-ე საარჩევნო ოლქში ჩატარებული არჩევნები უნდა გაუქმდეს”, - განაცხადა აკმამედ იმამკულიევმა.

”ნაციონალური მოძრაობის” ერთ-ერთი ლიდერის გიგა ბოკერიას თქმით, კი მათ ხელში ჩაუვარდათ ”ქართული ოცნების” წარმომადგენლის ზაზა ბაირამოვის საუბრის ამსახველი ვიდეო, სადაც ის ყვება თუ როგორ ჩაყარა 400 ბიულეტენი 36-ე უბანზე.

მისი თქმით, უბანზე დააშინეს ”ნაციონალური მოძრაობის” წარმომადგენელი და სწორედ ამის მეშვეობით მოხდა უბანზე საარჩევნო ბიულეტენების უკანონო ჩაყარა.