თინათინ ბოკუჩავა რამდენიმე საარჩევნო უბანზე დაპირისპირების საფრთხეებზე საუბრობს

პოლიტიკა - 15:42, 30 Oct, 2016

1275

„ერთიანი ნაციონალური მოძრაობის“ წევრი თინათინ ბოკუჩავა საარჩევნო პროცესის მიმდინარეობისას გამოვლენილ უხეშ დარღვევებზე, ქართული ოცნების წარმომადგენლების მხრიდან მოსყიდვის ფაქტებსა და ძალადობაზე საუბრობს. იგი მოუწოდებს ხელისუფლებას ძალადობის განმეორების პრევენციის მიზნით სასწრაფოდ დააკავოს და დასაჯოს გორის საკრებულოს წევრი კობა ბერიანიძე.

„გორში განსაკუთრებით დიდი კონცენტრაციაა სოფელ გარეჯვარში 50-ე უბანთან, სადაც ამ ყველაფრის კოორდინაციას ახდენს ზურაბ მურადაშვილი. ჩვენ მოვუწოდებთ შსს-ს, რომ ახლავე მიიღოს ზომები, რათა არ მოხდეს პროვოკაციები ამ უბნებთან და განსაკუთრებით დათვლის დროს არ იყოს ისეთი ტიპის პროვოკაციები, როგორიც ჩვენ ვიხილეთ 8 ოქტომბერს. ასევე მნიშვნელოვანია ოქროყანა, სადაც კრიმინალური მენტალიტეტის მქონე ადამიანების საკმაოდ დიდი ჯგუფი იმყოფება. ისინი იღებენ ალკოჰოლს და აშინებენ მოსახლეობას. აქაც მივმართავთ შსს-ს, რომ მიავლინონ წარმომადგენლები, რომ არ მოხდეს რაიმე ძალადობრივი ან სხვა ტიპის დაპირისპირება. ვაზისუბანში, ისევე როგორც დიღომში რამდენიმე დამკვირვებელს არ მიეცა გადაღების საშუალება. რუსთავში დაფიქსირდა მოსყიდვის ფაქტი”- აღნიშნა ბოკუჩავამ.

როგორც ბოკუჩავა აცხადებს, გარკვეულ უბნებზე რამდენჯერმე დაფიქსირდა მარკირებიანი ადამიანების შესვლა.

„ასეთი ფაქტი დაფიქსირებულია მთაწმინდაში მე-9, მე-8 და 16-ე უბნებზე, ისევე როგორც ისანში და მარნეულში, კერძოდ მე-17 უბანზე. რაც ყველაზე მნიშვნელოვანია, არის დაშინების მცდელობები, რომელიც ხდება უშუალოდ უბნის გარეთ და აქ ძირითადად არის კრიმინალური მენტალიტეტის ან მსგავსი ტიპის ადამიანების ჩარევით ხდება ეს დაშინებები, რომ ადამიანებს არ შეეძლოთ თავისუფლად გამოხატონ საკუთარი ნება. კიდევ ერთხელ მოვუწოდებთ შსს-ს, ასეთი ტიპის ჯგუფების დაშლა უზრუნველყოს, რომ ადამიანებმა თავისუფლად შეძლონ უბნებზე მისვლა” - განაცხადა ბოკუჩავამ.