"ჩვენ ამას არ ვადასტურებთ" - საქართველოში თურქეთის ელჩი სარფის საბაჟოზე თურქეთის მხარეს ბომბის აღმოჩენას არ ადასტურებს

პოლიტიკა - 20:23, 28 Oct, 2016

4531

საქართველოში თურქეთის რესპუბლიკის ელჩი თურქულ მედიაში გავრცელებულ ინფორმაციას, სარფის საბაჟო-გამშვები პუნქტის თურქეთის მხარეს ხელნაკეთი ბომბის აფეთქების შესახებ, არ ადასტურებს.
ზექი ლევენთ გუმრუქჩუს თქმით, სარფის საბაჟოზე არსებული შეფერხება ტექნიკურ ხარვეზს უკავშირდება.
„სარფთან დაკავშირებით საქმე გვაქვს ტექნიკურ ხარვეზთან. ეს არ ხდება მხოლოდ სარფის საბაჟოზე. ხარვეზს ადგილი აქვს მთელი თურქეთის მასშტაბით. გავრცელდა ინფორმაცია, თითოქოს იქ უნდა მომხდარიყო ტერორისტული აქტი, თუმცა ეს არ შეესაბამება სიმართლეს. ჩვენ ამას არ ვადასტურებთ“, - განაცხადა ზექი ლევენთ გუმრუქჩუმ.

ინფორმაცია იმის შესახებ, რომ სარფში თურქულ მხარეს, ხელნაკეთი ბომბის აფეთქება აღკვეთეს თურქულმა მედიამ დღეს გაავრცელა, მათივე ცნობით მამაკაცი, რომელიც ბომბის აფეთქებას ცდილობდა გაუვნებელყოფილია.

მოგვიანებით ეს ინფორმაცია შესაბამისმა ორგანოებმა არ დაადასტურეს.

სარფის საბაჟო ორი დღეა შეფერხებით მუშაობს. საქართველოს მოქალაქეები ვერც თურქეთიდან სამშობლოში ბრუნდებიან და ვერც თურქეთის მიმართულებით გამგზავრებას ვერ ახერხებენ. თურქული მხარე სასაზღვრო პუნქტის ჩაკეტვის მიზეზად ტექნიკურ გაუმართაობას ასახელებს.