,,კრწანისის“ სამხედრო ბაზის ინციდენტი - თინა ხიდაშელი ბაზების დაუცველობაზე საუბრობს

პოლიტიკა - 19:05, 28 Oct, 2016

2952

თავდაცვის ყოფილმა მინისტრმა თინა ხიდაშელმა "კრწანისის" ინციდენტთან დაკავშირებით მოქმედი მინისტრის განცხადებები გააკრიტიკა და თქვა, რომ ლევან იზორიამ "მეორე დილასვე რეცეპტი გამოწერა, დასკვნაც დაწერა".
„არ მინდა დავემსგავსო დღევანდელ თავდაცვის მინისტრს, რომელმაც მეორე დილითვე, რეცეპტი გამოწერა, დასკვნაც დაწერა. კი იძახდა გამოძიება მიმდინარეობსო, მაგრამ აბსოლუტურად ყველაფერი დეტალურად მოგვიყვა, თითქოს ის ადგილზე იმყოფებოდა და თავისი თვალით ჰქონდა ნანახი. მას ალბათ არ ახსოვს ის ამბები, ასე ნაჩქარევად გაკეთებული განცხადებები მერე როგორ მთავრდებოდა ხოლმე. ამიტომ მე ნამდვილად დაველოდები გამოძიებას. სამწუხაროდ, რაც დღემდე მოვისმინეთ, იმდენად წინააღმდეგობრივია, იმდენი რამაა ერთმანეთთან შეუსაბამო და ურთიერთგამომრიცხავი, რომ ძალიან რთულია გაჰყვე ამ ვერსიას. ამას კიდევ უფრო ამძაფრებს ის განცხადება, რომელიც პრემიერ-მინისტრისგან მოვისმინეთ. ჩემთვის საერთოდ წარმოუდგენელი იყო, როდესაც პრემიერ-მინისტრი გვეუბნება რომ მან ყველაფერი გაარკვია, კითხვები არ აქვს და კითხვებს აღარ მიიღებს. გამომრჩა ის მომენტი, როდესაც ეტყობა პრემიერ-მინისტრისგან რომ უნდა ვითხოვოთ ნებართვა, კითხვები დავსვათ თუ არა ამა თუ იმ საკითხზე. თუ ყველამ ყველაფერი იცის, მაშინ რატომ ატარებენ გამოძიებას, გამოვიდნენ და მოგვიყვნენ, დააკავონ ადამიანები, რომლებიც არიან პასუხისმგებლები, საზოგადოებას საბრალდებო დასკვნა გააცნონ და საქმე სასამართლოში წაიღონ. ასე საუბარი არ შეიძლება, როდესაც საქმე ერთი მხრივ ადამიანის სიცოცხლეს ეხება და მეორე მხრივ, არანაკლებ მნიშვნელოვან ღირებულებას ქვეყნის თავდაცვისუნარიანობას და ერთ-ერთი უმნიშვნელოვანესი სამხედრო ობიექტის დაცვას“ - აღნიშნა თინა ხიდაშელმა.

მისი თქმით, ის კომენტარისგან თავს შეიკავებს და გამოძიების დასრულებას დაელოდება. ის ვარაუდობს, რომ კრწანისის ინცინდენტი შესაძლოა ყოფილიყო სტანდარტული კრიმინალური შემთხვევა.

"გამომდინარე იქიდან, რაც მოვისმინეთ როგორც იურისტმა შემიძლია ვივარაუდო რომ არის ის, რომ უფრო ჩვეულებრივი, სტანდარტული კრიმინალური მდგომარეობაა და არა რაიმე უსაფრთხოების წინააღმდეგ განხორციელებული თავდასხმა, მაგრამ დაველოდოთ გამოძიების შედეგებს და ყველაზე მთავარია, გავაანალიზოთ ის განცხადებები. ვისურვებდი, რომ ამ ქვეყანში არასოდეს იყვნენ ხელისუფლებაში ხალხი, როდესაც 2 საათში დეტალურად მოგვიყვებიან ამბავს, შეეცდებიან საზოგადოებას მიასაღონ საკუთარი ვერსია, დღეები რომ გადის, იმ ვერსიაში თავადვე შეიტანონ ცვლილებები,"- აღნიშნა ხიდაშელმა.

თინა ხიდაშელის თქმით, ბევრ ბაზაზე უსაფრთხოების ზომები ძალიან ხშირად ირღვევა მეცხვარეების მიერ.

"მთავარი პრობლემა იმაში მდგომარეობს, რომ სამხედრო ობიექტების უდიდესი ნაწილი შემოღობილიც კი არ არის, რა ბაზაზე შეღწევაზე ვლაპარაკობთ,“- განაცხადა თინა ხიდაშელმა.