"თარხან-მოურავის განცხადება ეწინააღმდეგება საქართველოს ოფიციალურ კურსს"- საქართველოს საელჩო აზერბაიჯანში

პოლიტიკა - 14:35, 26 Oct, 2016

3562

აზერბაიჯანში საქართველოს საელჩოს განცხადებით, საქართველო და აზერბაიჯანი - ისტორიულად მოძმე სახელმწიფოები არიან და ამის დადასტურებაა წარსულიც, აწმყოც და მომავლის ერთობლივი გეგმებიც.
საქართველოს დიპლომატიური წარმომადგენლობის განცხადებას აზერბაიჯანული Trend.az-ი აქვეყნებს. გამოცემის ინფორმაციით აღნიშნული კომენტარი ზოგიერთი ქართველი პოლიტიკოსის განცხადებების, კერძოდ კი „პატრიოტთა ალიანსის“ ლიდერის დავით თარხან-მოურავის საპასუხოდ გაკეთდა. როგორც Trend.az-ი წერს დავით თარხან მოურავმა განაცხადა, რომ საქართველოს ხელისუფლების ზედმეტმა ლმობიერებამ შესაძლოა ქვეყანა დაშლის პირას მიიყვანოს, ამ შემთხვევაში კი აზერბაიჯანი მარნეულის რეგიონის მიტაცებას შეეცდება, რომელიც კომპაქტურად არის დასახლებული აზერბაიჯანელებით.

„ორივე სახელმწიფოს ხალხმა საუკუნეების განმავლობაში დაამტკიცა, ერთმანეთისადმი მეგობრული დამოკიდებულება, რელიგიური და ეთნიკური ტოლერანტობა და შექმნეს კავშირები, რომელიც გამსჭვალულია მულტიკულტურალიზმის პრინციპებით. ამიტომ ნებისმიერი მსგავსი სახის განცხადება, რომელსაც საზოგადოებაში მხარდაჭერა არ აქვს, პოპულიზმის სახეს ატარებს“- განაცხადეს საელჩოში.

დიპლომატიურ წარმომადგენლობაში აღნიშნეს, რომ ნებისმიერი მსგავსი სახის განცხადება ფუნდამენტურად ეწინააღმდეგება საქართველოს სახელმწიფოს ოფიციალურ კურსს, რომელიც დაფუძნებულია ქართველის ხალხის მენტალობაზე.