იმის გამო რომ სამკურნალოდ ცხინვალიდან თბილისში არ იარონ, თიბილოვი მოსკოვს ავიაციის შექმნას სთხოვს

პოლიტიკა - 12:51, 26 Oct, 2016

3493

ოკუპირებული ცხინვალის რეგიონის დე ფაქტო ხელისუფლება რუსეთთან საკუთარი ავიაციის შექმნის საკითხზე მსჯელობს, მათ შორის სამედიცინო ავიაციისაც, რომელიც ლეონიდ თიბილოვის თქმით, ადამიანების ოპერატიულ გადაყვანას მოემსახურება, როგორც „ქვეყნის შიგნით, ისევე ქვეყნის საზღვრებს გარეთაც“. ამ მომენტისთვის ოკუპირებულ ე.წ სამხრეთ ოსეთსა და რუსეთს მხოლოდ ცხინვალი-ვლადიკავკაზის გზა აკავშირებს.

„ჩვენ ავიაცია ძალიან გვჭირდება, განვიხილეთ მისი შექმნის საკითხი. მთის გზა ზოგჯერ იკეტება ღვარცოფების და ქვათაცვენის გამო, ამის გამო კი შესაძლოა პაციენტებისთვის დახმარების აღმოჩენა დაგვიანდეს".

თიბილოვის თქმით, არსებობს კიდევ ერთი პრობლემა სამხრეთ ოსეთისთვის, იმის გამო რომ საქართველოში მედიცინის ზოგიერთი დარგი კარგად განვითარებულია, ცხინვალის რეგიონის მოსახლეობა სამკურნალოდ იქ გადადის, რადგან იქ მოხვედრა უფრო ადვილია, ვიდრე ჩრდილოეთ ოსეთში.

„ეს ხდება იმ დროს, როდესაც სამხრეთ ოსეთსა და საქართველოს შორის არც პოლიტიკური, არც ეკონომიკური ურთიერთობა არ არის, გარდა ჟენევის დისკუსიებისა. საქართველოში არსებობს სერიოზული პროექტი ჯანდაცვის სფეროში სამხრეთ ოსეთის მოქალაქეების ჩართულობასთან დაკავშირებით, რომელსაც აფინანსებენ და მხარს უჭერენ დასავლეთის ქვეყნები. გამოდის რომ ეს საჭირო ღონისძიებაა, ამიტომ ჩვენ, რომ ჩვენი სანიტარული ავიაცია და საერთოდ ავიაცია გვქონდეს, სასარგებლო იქნებოდა.“- განაცხადა ლეონიდ თიბილოვმა „ტას“-თან საუბარში.