ნატო-ს გენერალური მდივნის სპეციალური წარმომადგენელის კავკასიასა და ცენტრალურ აზიაში ჯეიმს აპატურაის განცხადებით, შავი ზღვის რეგიონის უსაფრთხოებაზე საუბარი საქართველოს გარეშე არ ჩაივლის. ამის შესახებ აპატურაიმ „მოამბის“ კორესპონდენტთან ქეთევან ქარდავასთან ნატო-ს თავდაცვის მინისტერიალამდე, ექსკლუზიურ ინტერვიუში აღნიშნა.

აპატურაის განცხადებით, ის უკვე იცნობს საქართველოს ახალ თავდაცვის მინისტრს ლევან იზორიას და თანამშრომლობს მასთან.

„მე მქონდა შესაძლებლობა და პატივი, შევხვედროდი საქართველოს ახალ თავდაცვის მინისტრს. შეხვედრა იყო საკმაოდ პოზიტიური.

ნატოს სურს იხილოს საქართველოში რეფორმების განგრძობითობა. ცერემონიები და წითელი ლენტების გაჭრა კარგია, ხალხს აქვს შესაძლებლობა თანამშრომლობის შედეგი იხილოს, ჩვენთვის მნიშვნელოვანია უკვე იმპლემენტაცია, ნატოს პერსონალი, მათი მუშაობა, გეგმის შედგენა, ერთობლივი წვრთნები.

ჩვენ ვიმუშავებთ და უკვე ვმუშაობთ ახალ თავდაცვის მინისტრთან. გვაქვს ძალიან ბევრი საქმე. უელსის სამიტზე მიღებული არსებული პაკეტის იმპლემენტაცია ძალიან კარგად მიმდინარეობს. ვემზადებით ახალი ერთობლივი წვრთნისთვის. თავდაცვის აღმშენებლობის სკოლა არამარტო გავხსენით, უკვე კურსებს ვადგენთ. მე ვიყავი აღფრთოვანებული, როდესაც შეფასების ერთობლივი ცენტრი ვნახე. ცენტრში უკვე უამრავი ადამიანი მუშაობს, კარგად არის აღჭურვილი და საინტერესოა ნატოსთვის, წევრი ქვეყნებისთვის და პარტნიორებისთვის.

რაც შეეხება შავი ზღვის რეგიონის უსაფრთხოებას, ჩვენ გვაქვს კონსულტაციები, მივიღეთ წინადადებები საქართველოდან. შავი ზღვის რეგიონის უსაფრთხოებაზე საუბარი საქართველოს გარეშე არ ჩაივლის. პირიქით, მაქსიმალურად იქნება ჩართული. ვაკეთებთ შეფასებას და ვათანხმებთ ფორმატებს“, - განაცხადა აპატურაიმ.

ნატო-ს თავდაცვის მინისტერიალი ამ კვირაში იგეგმება.