საქართველოს პრეზიდენტი მიიჩნევს, რომ „კრწანისის“ სამხედრო ბაზაზე მომხდარ ფაქტთან დაკავშირებით საჭიროა დროული დაობიექტური გამოძიება ისე, რომ არ დარჩეს არც ერთი კითხვის ნიშანი. პრეზიდენტის პოზიციაზე დღეს მარგველაშვილის პრესსპიკერმა ეკა მიშველაძემ ისაუბრა:

„პრეზიდენტი მიიჩნევს, რომ კრწანისის ეროვნულ სასწავლო ცენტრში მომხდარი სამწუხარო ფაქტის დროული და გამჭვირვალე გამოძიება უმნიშვნელოვანესია. მოგეხსენებათ, ეს არის ძალიან მნიშვნელოვანი და ასევე, საქართველოში ერთ-ერთი ყველაზე დაცული ცენტრი, სადაც განთავსებულია ნატო-საქართველოს ერთობლივი წვრთნისა და შეფასების ცენტრი. სამხედრო ძალების უმაღლესი მთავარსარდალი მიიჩნევს, რომ ყველა კითხვას, რომელიც აქვთ დაღუპულის ოჯახის წევრებსა და საზოგადოებას, უნდა გაეცეს კომპეტენტური პასუხი. არ უნდა დარჩეს არცერთი კითხვის ნიშანი და ეჭვი, ამ ფაქტთან მიმართებაში. ეს მნიშვნელოვანია, როგორც სახელმწიფო ინტერესებიდან გამომდინარე, ასევე სამხედრო ძალების რეპუტაციისთვის“,- აღნიშნა ეკა მიშველაძემ.