იზორიამ დაადასტურა, რომ გარდაცვლილი გიორგი შენგელიას ძმა "კრწანისის" ცენტრში მსახურობდა

პოლიტიკა - 10:42, 25 Oct, 2016

14134

თავდაცვის მინისტრი ადასტურებს, რომ კრწანისის სასწავლო ცენტრში მომხდარი ინციდენტისას დაღუპული გიორგი შენგელიას ძმა აღნიშნულ ცენტრში მიმდინარე წლის 15 სექტემბრამდე მსახურობდა. ამის შესახებ იზორიამ „იმედის“ ეთერში ისაუბრა, მისი თქმით, ბუნებრივია, რომ მის ძმასთან გამოძიებას გარკვეული კითხვები ექნება:

”ის ნამდვილად მსახურობდა აღნიშნულ ცენტრში ამა წლის 15 სექტემბრამდე. შესაბამისად გამოძიებას ბუნებრივია აქვს გარკვეული კითხვები და გამოძიების ინტერესებიდან გამომდინარე, მიზანშეწონილი იქნება გამოკითხვის წარმოება ძმასთანაც, თუმცა მისი ადგილმდებარეობის დადგენა ამ ეტაპამდე შეუძლებელი გახდა. შესაბამისად, როდესაც მის ადგილმდებარეობას საგამოძიებო ორგანოები დაადგენენ, ეს გამოკითხვაც ჩატარდება”, - განაცხადა იზორიამ.

საქართველოს თავდაცვის უწყების ინფორმაციით წვრთნებისა და სამხედრო განათლების სარდლობის მხარდამჭერ ცენტრ კრწანისის ტერიტორიაზე უცხო პირების მხრიდან შეჭრის ფაქტი 23 ოქტომბერს, დაახლოებით 03:30საათზე დაფიქსირდა. რამდენიმე უცხო პირი არ დაემორჩილა განწესში მყოფი გუშაგის სიტყვიერ გაფრთხილებას და თავს დაესხა მას, რის შემდეგაც გუშაგმა წესდებით გათვალისწინებული მოქმედებები განახორციელა და ცენტრის ტერიტორიაზე შეჭრის ფაქტი აღკვეთა. განხორციელებული სროლის შედეგად 23 წლის გიგა შენგელია დაიღუპა.