ცნობილმა უკრაინულმა როკ-ჯგუფმა „ოკეან ელზი“-მ მსოფლიო ტურნეს ფარგლებში კონცერტი თბილისშიც გამართა. კონცერტზე, რომელიც 22 ოქტომბერს თბილისის სპორტის სასახლეში შედგა, სვიატოსლავ ვაკარჩუკმა და მისმა ჯგუფმა როგორც ძველი, ისე უკანასკნელი ალბომის ახალ ჰიტები შეასრულეს.

უკრაინული მუსიკის ლეგენდა სვიატოსლავ ვაკარჩუკი თბილისში კონცერტამდე ორი დღით ადრე, ჯგუფის წევრების გარეშე, თავის ოჯახთან ერთად ჩამოვიდა, იმისთვის, რომ მეგობრებს შეხვედროდა, ქართული სამზარეულო დაეგემოვნებინა და ღირსშესანიშნაობები დაეთვალიერებინა.

სვიატოსლავ ვაკარჩუკი ცნობილია, როგორც უკრაინის თავისუფლებისთვის და დამოუკიდებლობისთვის მებრძოლი ადამიანი, ის იმ მომღერლების რიცხვში შედის, რომლებიც რუსული ოკუპაციის პროტესტის ნიშნად, გამიზნულად არ მღერის რუსულ ენაზე და არც საუბრობს. თბილისში გამართულ კონცერტზეც მომღერალი მაყურებელს ინგლისურ ენაზე ეკონტაქტებოდა, მადლობას კი ქართულად უხდიდა.

სხვა ცნობილ თუ ახალ სიმღერებთან ერთად ვაკარჩუკმა სიმღერა "Мить" შეასრულა, რომელიც ომში დაღუპულ ქართველ და უკრაინელ ჯარისკაცებს მიუძღვნა. კონცერტის მსვლელობისას კი მეგობრობის და მხარდაჭერის გამოსახატად სცენაზე ქართული და უკრაინული დროშები აფრიალა. ქართული სიმღერა ვაკარჩუკთან ერთად მებო ნუცუბიძემ და ოთო ნემსაძემ შეასრულეს.