ცესკოს განმარტება ზუგდიდსა და მარნეულში ხვალ გასამართ კენჭისყრის პროცესთან დაკავშირებით

პოლიტიკა - 12:20, 21 Oct, 2016

1518

საქართველო ცენტრალური საარჩევნო კომისიის ინფორმაციით, განმეორებითი კენჭისყრისთვის, რომელიც ხვალ უნდა გაიმართოს, სამუშაოები დასრულებულია.

ცესკოს სპიკერის თქმით, 4 საარჩევნო უბანი კანონის მიხედვით 08:00 საათზე გაიხსნება. ანა მიქელაძის ინფორმაციით, საქმე ეხება ზუგდიდისა და მარნეულის რამდენიმე უბანს.

მისივე თქმით, კენჭისყრა მარნეულში ერთ, ზუგდიდში კი სამ უბანში გაიმართება.

სოფელ განმუხურსა და ზუგდიდში ერთმანეთს "ნაციონალური მოძრაობისა" და "ქართული ოცნების" კანდიდატები დაუპირისპირდებიან.

ზუგდიდში არჩევნებში მონაწილეობას ოპოზიციიდან სანდრა რულოვსი და მმართველი პარტიიდან კი ედიშერ თოლორაია იღებენ.

მარნეულში ერთმანეთს აჰმედ იმმაყულიევი და თამაზ ნავერიანი დაუპირისპირდებიან.

„განმეორებითი კენჭისყრა გაიმართება ოთხ საარჩევნო უბანზე. ზუგდიდში ორ სოფელში ტარდება არჩევნები, ერთი არის განმუხურის სოფელი, სადაც არის ერთ საარჩევნო უბანი, ხოლო ორი საარჩევნო უბანი არის განთავსებული სოფელ ჯიხაშკარში. რაც შეეხება მარნეულს, იქ ერთი საარჩევნო უბანი არის განთავსებული სოფელ ყიზილაჯლოში, ეს არის 48-ე საარჩევნო უბანი, სადაც ის ცნობილი პროცესები განვითარდა,“ - განაცხადა ანა მიქელაძემ.

ცნობისათვის, 22 ოქტომბერს ზუგდიდის რაიონში განმეორებით ხმის მიცემა ზუგდიდის რაიონის სამ უბანზე - განმუხურის 38-ე და ჯიხაშკარის 79-ე და 108-ე საარჩევნო უბნებზე გაიმართება.

ჯიხაშკარში იმ მიზეზით, რომ 8 ოქტომბრის არჩევნებზე, კენჭისყრის დასრულების შემდეგ უბანი დაარბიეს, არჩევნები ჩაშლილად გამოცხადდა. განმუხურში კი დარღვევების მიზეზით საოლქო საარჩევნო კომისიამ შედეგები გააბათილა.

რაც შეეხება ყიზილაჯლოს #48 საარჩევნო უბნს, ცესკომ შედეგების გაუქმების გადაწყვეტილება მიიღო. უბნის შედეგების გაუქმების მოთხოვნით, საოლქო კომისიაში საჩივარი არასამთავრობო ორგანიზაცია ,,მრავალეროვანმა საქართველომ" შეიტანა.
როგორც საჩივარში იყო აღნიშნული, ყიზლაჯლოს #48 საარჩევნო უბანზე მომხდარი ინციდენტის დროს, საარჩევნო პროცესი 20.00 საათამდე შეწყდა და ამომრჩეველს საკუთარი ნების გამოხატვის საშუალება აღარ მიეცა.