"შრომის უსაფრთხოების დაუცველობა უმწვავესი პრობლემაა"- სახალხო დამცველის საგანგებო განცხადება

პოლიტიკა - 21:01, 20 Oct, 2016

1242

სამუშაო ადგილებზე ადამიანთა დაშავებისა და გარდაცვალების გახშირებულ ფაქტებთან დაკავშირებით საქართველოს სახალხო დამცველი საგანგებო განცხადებას ავრცელებს:

„სრულიად შემაშფოთებელია არსებული რეალობა, როდესაც დასაქმებული ადამიანების სამუშაო ადგილებზე დაშავება და გარდაცვალება ჩვენი ცხოვრების ყოველდღიურ ნაწილად არის ქცეული. გუშინ და დღეს მედიით გავრცელდა ინფორმაცია მშენებლობაზე დასაქმებული ორი პირის გარდაცვალების შესახებ. მანამდე, 11 ოქტომბერს სახალხო დამცველი გამოეხმაურა ტყიბულში, მინდელის სახელობის მაღაროში მაღაროელის დაღუპვას.

შსს–ს ინფორმაციით, 2015 წელს სამუშაო ადგილზე დაშავდა და გარდაიცვალა 123 ადამიანი. აღნიშნული ვითარება მიუთითებს, რომ ქვეყანაში შრომის უსაფრთხოების დაუცველობა უმწვავესი პრობლემაა და სულ მცირე, 2–3 დღეში ერთხელ დგება შემთხვევები, როდესაც სამუშაო ადგილებზე დასაქმებული პირები ჯანმრთელობის მძიმე დაზიანებებს იღებენ ან იღუპებიან. ფაქტების მხოლოდ უკიდურესად მცირე რიცხვი ხვდება მედიისა და შესაბამისად, საზოგადოების თვალთახედვის არეში.“- აღნიშნულია ომბუდსმენის განცხადებაში.