"ნაციონალების" მხარდამჭერებს სოფელ საროში ცივი ზამთარი ელით

პოლიტიკა - 11:58, 19 Oct, 2016

16462

ასპინძაში, სოფელ საროს მოსახლეობა ტყე-კაფებიდან შეშის გამოსატანად ბილეთებს ერთი თვეა უშედეგოდ ელოდება. ადგილობრივები ამას საროს უბანზე „ოცნების“ წაგებულ არჩევნებს უკავშირებენ. არჩევნების პირველ ტურში, "ოცნების" კანდიდატს 37, "ნაციონალების" კანდიდატს კი 98 ხმა ერგო.

"ნაციონალების" მხარდამჭერებს, სოფელ საროში, ცივი ზამთარი ელით

სოფელ საროში, 30-მდე ადგილობრივებს ზამთრისათვის საშეშე მერქნის მოსამარაგებლად ბილეთები ისევ არ აუღია. მათი თქმით, სოფელში ბილეთები გამგებლის წარმომადგენელს უნდა მიეტანა, ამისთვის კი ადგილობრივებს შესაბამისი თანხა და პირადობებიც გამოართვა, თუმცა არჩევნების შემდეგ უკან დაუბრუნა და უთხრა, რომ ამაზე თავად უნდა ეზრუნათ.

„არჩევნებამდე ორი კვირით ადრე წაიღო და გვითხრა, რომ თავად მოგვიტანდა. არჩევნების წინა დღეს, მხოლოდ პირადობები მოგვიტანა, იმისათვის, რომ ხმა მიგვეცა, ახლა ფულიც დაგვიბრუნა და გვითხრა, ბილეთები თქვენ თვითონ აიღეთო“, -გვითხრა საროს მკვიდრმა გიორგი იველაშვილმა,

საროს მაცხოვრებლები არ გამორიცხავენ, რომ ბილეთების გარეშე პირადობების და თანხის დაბრუნება არჩევნებს უკავშირდებოდეს, რადგან არჩევნები ამ სოფლის უბანზე ხმათა უმრავლესობით „ნაციონალურმა მოძრაობამ“ მოიგო.

„ჯერ შეგვპირდნენ, რომ 30 სექტემბრამდე მოგვიტანდნენ ბილეთებს, მაგრამ არჩევნების დასრულებას ელოდებოდნენ, შემდეგ კი აღარ მოგვიტანეს“, - გვეუბნება ადგილობრივი გოდერძი ასპანიძე.

ადგილობრივების თქმით, აცივდა და სოფელში მალე ჩამოთოვს კიდეც, იმ შემთხვევაში თუ ბილეთებს დროულად ვერ მიიღებენ, ტყე-კაფებში მერქნის გამოსატანად ვეღარ შევლენ.

„ეს ხალხის წვალებაა, თუ მოჰქონდა სოფლის რწმუნებულს, ამოეტანა, თუ არა და რაღას მიჰქონდა. უკვე აცივდა, ცოტახანში ჩამოთოვს და შეშას სახლამდე ვეღარ მოვიტანთ“,-ამბობს გიორგი იველაშვილი.

რატომ დაუბრუნა ბილეთების გარეშე პირადობები საროს მცხოვრებლებს – ამ კითხვაზე გამგებლის ახლად დანიშნული წარმომადგენელი გელა გურგენიძე გვიხსნის, რომ ადგილობრივები თვად უნდა მივიდნენ ბანკში და მერქნის მოსატანად კოდები მიიღონ.

„ბილეთების მოსახლეობამდე მიტანა წარმომადგენლის ვალდებულებაში არ შედის, მე უბრალოდ იმიტომ წავიღე, რომ დახმარება მინდოდა”, - გვეუბნება გელა გურგენიძე და კითხვაზე, მაშინ უკან რაღატომ დაუბრინა, გვპასუხობს, რომ უბრალოდ ასე გადაწყვიტა, –„დახმარება კი არ გადავიფიქრეთ, ასე გადავწყვიტეთ, რომ თავად მივიდნენ ბანკში და აიღონ. კოდები არის და ეს ნებისმიერ დროს შეუძლიათ გააკეთონ“.

ამ დროისათვის სოფელ საროში, საშეშე მერქანი მხოლოდ 20-მდე ადგილობრივს აქვს მომარაგებული. მათ, ვინც ბილეთები 20 სექტემბრამდე, „ქართული ოცნების“ ერთერთი აქტივისტისგან, კუკური პალაჭიაშვილისგან მიიღო. როგორც ადგილობრივები ამბობენ, პლაჭიაშვილმა ბილეთები მხოლოდ „ოცნების“ მხარდამჭერებს მიუტანა.

„პირველ ეტაპზე ვისაც პალჭიაშვილმა ამუტანა, იმათ მოიტანეს შეშა. ზოგს მისცენ და ზოგს არა , ჩვენც ხომ ცოდოები ვართ, ეგერე როგორ შეიძლება“, -ამბობენ ადგილობრივები.

წყარო: ,,სამხრეთის კარიბჭე“