ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი არჩევნების მეორე ტურების საკითხზე კომენტარს აკეთებს. მისი განცხადებით, კონსტიტუციის შეცვლით ძალაუფლების უზურპაცია არ ხდება:

„ეს არის გრძელი, მშვიდი, დინჯი პროცესი, რომელშიც მთელი საზოგადოება უნდა იყოს ჩართული. პოლიტიკური პარტიებიც, რომლებიც პარლამენტში თუ პარლამენტს მიღმა არიან, არასამთავრობო ორგანიზაციები, ნებისმიერი ტიპის ორგანიზაცია, ექპსერტები და ყველა უნდა იყოს ჩართული და ფართო საზოგადოების აზრი უნდა იყოს მოსმენილი.

ყველაფერში შეიძლება „ქართული ოცნების“ დადანაშაულება, მაგრამ ძალაუფლების უზურპაციაში ვერ დაადანაშაულებ. შეუძლებელია, ერთდროულად ეძახდე ხელისუფლებას თან უნიათოს, თან უზურპაციაში ადანაშაულებდე. 4 წლის განმავლობაში „ქართულ ოცნებას“ სრული ბერკეტი ჰქონდა ნებისმიერი ცვლილების გასატარებლად, ყველაფერი რაც არის ძალაუფლების კონცენტრაციისთვს საჭირო, ნებისმიერი კანონის მისაღებად და პრეზიდენტის ვეტოს დასაძლევად. ერთადერთი, რისი საშუალებაც არ იყო დღემდე, ეს იყო კონსტიტუციის შეცვლა და კონსტიტუციის შეცვლით არ ხდება ძალაუფლების უზურპაცია. ამის სურვილი რომ ვინმეს ჰქონდეს, ამის ყველა ბერკეტი იყო, 4 წლის განმავლობაში, არ გამოგვიყენებია და არც შემდგომში არ იქნება გამოყენებული“,- განაცხადა ჟურნალისტებთან საუბრისას მინისტრმა.