ირაკლი ალასანიას განცხადებით, მიუხედავად საქართველოში მოსახლეობაში არსებული მხარდაჭერისა, არჩევნების შემდეგ არ დადგა ისეთი შედეგი, რომ „თავისუფალ დემოკრატებს“ საქმიანობა პარლამენტში გაეგრძელებინა. მისი პოლიტიკიდან დროებით წასვლას ირაკლი ალასანია სწორედ ამ შედეგზე პასუხისმგებლობის აღებად აფასებს. აღნიშნულ თემაზე ალასანიამ გადაცემა "არჩევანში" ისაუბრა:

„შედეგი იყო მტკივნეული, დაშვებული იქნა შეცდომები. მიუხედავად მხარდაჭერისა, ჩვენ კრიტიკული მასა ვერ მოვიპოვეთ, რომ პარლამენტში გაგვეგრძელებინა მოღვაწეობა. ჩვენი მიზნების განხორციელების საშუალება, შედეგებმა არ მოგვცა. აქედან გამომდინარე, მე როგორც პარტიის ლიდერმა, ჩემს თავზე ავიღე პასუხისმგებლობა და დროებით დავტოვე პოლიტიკა. ამას სერიოზული ფიქრი სჭირდება, რამ გამოიწვია ეს შედეგი. პარტიას სერიოზული რეორგანიზაცია სჭირდება. იყო დაშვეული შეცდომები, რასაც სერიოზული გაანალიზება სჭირდება. სწორეედ ამის გამო მივიღე ეს გადაწყვეტილება. შედეგის მიხედვით ჩანს, რომ შეცდომები მეც დავუშვი “- განაცხადა ირაკლი ალასანიამ.

ალასანიას თქმით, მას იმედი აქვს , რომ 4 წლის შემდეგ მას და მის პარტიას მიეცემა საშუალება, რომ თავისი ჩანაფიქრი განახორციელოს.

„მე არ გამოვრიცხავ, რომ დავბრუნდე პოლიტიკაში. ეს ოთხი წელი დამჭირდება იმისთვის რომ მე სასარგებლო საქმეები ვაკეთო, ეს იქნება საერთაშორისო არენაზე თუ აქ. მე ამ 4 წელს გამოვიყენებ მაქსიმალურად რომ ქვეყნისთვის სასარგებლო ვიყო“- აღნიშნა ალასანიამ.