სახელმწიფო ვალის საპროგნოზო მოცულობა ისტორიულ მაქსიმუმზეა

პოლიტიკა - 19:08, 18 Oct, 2016

1840

საქართველოს სახელმწიფო აუდიტის სამსახურის დასკვნით 2017 წლის ბიუჯეტის პროექტის მიხედვით სახელმწიფო ვალის მოცემული საპროგნოზო მოცულობა 15,403.1 მლნ ლარი ისტორიულ მაქსიმუმს წარმოადგენს:

„საქართველოს სახელმწიფო ბიუჯეტის 2017 წლის კანონის პროექტის მიხედვით, სახელმწიფო ვალის საპროგნოზო ზღვრული მოცულობა განისაზღვრა 15,403.1 მლნ ლარის ოდენობით, რაც 2016 წლის დაგეგმილ მაჩვენებელს 827.6 მლნ ლარით (6.0%) აღემატება. სახელმწიფო ვალის მოცემული საპროგნოზო მოცულობა ისტორიულ მაქსიმუმს წარმოადგენს. 2016 წლის ბიუჯეტის კანონში წარმოდგენილი მონაცემებით, წლის ბოლოს სახელმწიფო ვალი მშპ-ს 42.6%-ს გაუტოლდება, ხოლო 2017 წლის ბიუჯეტის კანონის პროექტის მიხედვით, ანალოგიური მაჩვენებელი 42.1%-ს შეადგენს. შედეგად, 2017 წლის ბოლოსათვის მოსალოდნელია ვალის ტვირთის ინდიკატორის (ვალი/მშპ) 0.5 პროცენტული პუნქტით შემცირება, თუმცა საყურადღებოა, რომ წარმოდგენილი ბიუჯეტის კანონისპროექტის მიხედვით, სახელმწიფო ვალის მოცულობა მშპ-თან მიმართებაში კვლავ გადააჭარბებს საქართველოს სოციალურ-ეკონომიკური განვითარების სტრატეგია „საქართველო 2020“-ით დადგენილ 40%-იან ნიშნულს.“- აღნიშნულია უწყების დასკვნაში, რომელიც მან 2017 წლის სახელწიფო ბიუჯეტის პროექტთან დაკავშირებით წარადგინა.