"10 დღეა ვიძინებ გაურკვეველ საქართველოში, ამასობაში ვგრძნობ ხიფათს"- უსუფაშვილი არჩევნების შედეგებზე

პოლიტიკა - 17:48, 18 Oct, 2016

6072

პარლამენტის მოქმედმა თავმჯდომარემ დავით უსუფაშვილმა ინგა გრიგოლიას გადაცემაში არჩევნების შედეგებზე ისაუბრა და აღნიშნა, რომ მიუხედავად იმისა, რომ საქართველომ არჩევნების მშვიდობიანად ჩატარება შეძლო პოლიტიკური განვითარების თვალსაზრისით ქვეყანა შეყოვნდა:

“10 დღეა ვიძინებ გაურკვეველ საქართველოში. არჩევნების შედეგებმა ბევრი ვინმე და რამე სრულიად ახლებურად წარმოაჩინა, ჩვენ ვცხოვრობთ განსხვავებულ საქართველოში, რომელიც უკეთესია იმასთან შედარებით რაც იქნებოდა იმ შემთხვევაში თუ ჩვენ ვერ შევძლებდით არჩევნების მშვიდობიანად ჩატარებას. ეს ჩვენ ქვეყანაში და ჩვენ რეგიონში ჯერ კიდევ საკითხავია ხოლმე სამწუხაროდ. მე ვერ ვიტყვი, რომ ჩვენ მივიღეთ უკეთესი საქართველო. მე მგონია, რომ ჩვენ მივიღეთ პოლიტიკური განვითარების თვალსაზრისით შეყოვნებული საქართველო. ეს მუხრუჭი მომძლავრდება თუ საერთოდ მოიხსნება და სადღაც გადავვარდებით, უახლოეს მომავალზეა დამოკიდებული და პირველ რიგში, იმათზე ვინც ხალხის მანდატით აღიჭურვა და აღიჭურვა არა უბრალოდ სახელისუფლებო მანდატით, არამედ სუპერ აბსოლუტური ხელისუფლების მანდატით აღიჭურვა. მათზე ბევრი რამ არის დამოკიდებული. დღეს ჩვენ გვესმის „ქართული ოცნების“ ბევრი წარმომადგენლის განცხადება, რომლებიც გვამშვიდებენ, რომ რატომ შფოთავთ, ჩვენ ხომ ნორმალური ხალხი ვართ? მე მჯერა თითოეული მათგანის ინდივიდუალურად, მაგრამ მე ამასობაში ვგრძნობ ხიფათს მათი კოლექტიური ქმედებების გამო და მე ყველა კოლეგას მინდა ამ დროს შევახსენო ერთი მარტივი ამბავ, ჩვენ არაერთხელ ჩავასწორეთ ანტიმონოპოლიური კანონი, რომლითაც ბიზნესსფეროში ვაწესებთ გარკვეულ ლიმიტებს, ამით ჩვენ იმას კი არ ვაცხადებთ, რომ ჩვენ რომელიმე კომპანიას არ ვენდობით და იქ ცუდი ხალხი მუშაობს, არამედ ჩვენ ვებრძვით მონოპოლიას, რომელიც კარგ ადამიანებსაც ცუდისკენ უბიძგებს, მათ შორი პოლიტიკაშიც. მეორე ტურში სერიოზულ ცვლილებას არ ველოდები. მე არ ვამბობ, რომ ხვალიდან დაუწყება უბედურებები საქართველოში, მაგრამ იმას ნამდვილად ვამბობ, რომ ყველა დანარჩენმა მოქალაქემ უახლოესი წლების განმავლობაში უნდა გავაკეთოთ მაქსიმუმი, რომ ის სახიფათო ვითარება, რაც შეიქმნა, გადაწყვეტილებების მიღების დროს სერიოზული შეცდომების დაშვების თვალსაზრისით მინიმუმამდე დავიყვანოთ.“- განაცხადა დავით უსუფაშვილმა.