"ღმერთმა ქნას, ხაშურის მოსახლეობამ ეს გამოასწოროს, თორემ მივატოვებ"- გელაშვილი ამომრჩევლებით უკმაყოფილოა

პოლიტიკა - 16:34, 17 Oct, 2016

14180

ხაშურში "ქართული ოცნების" მაჟორიტარობის კანდიდატი ვალერი გელაშვილი გაზეთ "ვერსიასთან" იმ მიზეზებზე საუბრობს, რის გამოც მან საპარლამენტო არჩევნებში საკუთარ რაიონში საკმარისი ხმების მოპოვება ვერ შეძლო და მეორე ტურში "თოფაძე-მრეწველების" კანდიდატთან სიმონ ნოზაძესთან მოუწევს დაპირისპირება:
"ჯერ არ დავმარცხებულვარ, წინ მეორე ტურია, უბრალოდ ნოზაძე ძველი ,,კაგებეშნიკია'', იქ 5 თუ 6 წელი იმუშავა და ხალხს რაღაცები მოატყუა, მაგრამ ტყუილს მოკლე ფეხები აქვს. სიმონ ნოზაძე ჩვენი ხელისუფლების პერიოდში, 2012 წლამდე ნაციონალურ მოძრაობას, კერძოდ ვანო მერაბიშვილს დაყვებოდა უკან. ახლა კი ჩამოდიოდა ხაშურში და ხალხს ატყუებდა, მიეცით ხმა ,,ქართულ ოცნებას'' და სიმონ ნოზაძესო. ნოზაძემ მოსახლეობას თავი ,,ქართული ოცნების'' კანდიდატად წარუდგინა და სიცრუეში შეიყვანა ხალხიცა და პარტია ,,თოფაძე-მრეწველებიც''. ძალიან შეურაცხყოფილი დავრჩი ჩემი ხალხისგან. რაც კი ხაშურის მუნიციპალიტეტში კეთდება, მე ვაკეთებ. სადაც საკათედრო ეკლესიას ვაშენებ, იმ ქუჩამაც რომ არ მომცა ხმა, ეს ძალიან შეურაცხმყოფელი იყო ჩემთვის. ღმერთმა ქნას, ხაშურის მოსახლეობამ ეს გამოასწოროს, თორემ მივატოვებ, საერთოდ წავალ ამ რაიონიდან. მაქვს ისეთი ადგილები, სადაც წასვლა შემიძლია. 1999 წელს, იმ რთულ პირობებში, ჩემმა რაიონმა დამიჭირა მხარი და მას შემდეგ ხაშური არ მიმიტოვებია. სწორედ ამიტომ ვაკეთებ ამდენ რამეს. ვალდებულებას ვგრძნობდი ჩემი ხაშურის მიმართ და ახლა თუ მიღალატა მოსახლეობამ, ალბათ წავალ. ჩემ ცხოვრებაში თანმიმდევრული ვარ, ჩემს რაიონს ვეხმარები, სიკეთეს ვაკეთებ. პოლიტიკაში იმიტომ შემოვედი, განუკითხაობა იყო საქართველოში. ეს ყველაფერი ბიძაჩემის გატაცებიდან დაიწყო. ბრძოლა ჯერ არ დამიმთავრებია. სანამ მიხეილ სააკაშვილი გარეთ არის და ციხეში არ ზის, ბრძოლას დამთავრებულად ვერ გამოვაცხადებ. სანამ ნაციონალები პასუხს არ აგებენ ყველაფრის წინაშე, ვერსად წავალ, პოლიტიკაში უნდა ვიყო. ვერსიის დონეზეც კი არ მინდა დავუშვა ჩემი დამარცხება! მხოლოდ და მხოლოდ გამარჯვებას ველი!"- განაცხადა ვალერი გელაშვილმა.