ხელისუფლებასთან თანამშრომლობა სენსაცია რატომაა? ამის შესახებაც ვისაუბრებ

ხელისუფლებასთან თანამშრომლობა სენსაცია რატომაა? ამის შესახებაც ვისაუბრებ - ზურაბ აბაშიძე

პოლიტიკა - 11:50, 17 Oct, 2016

4237

„თავისუფალი დემოკრატების“ ერთ-ერთი ყოფილი ლიდერის ზურაბ აბაშიძისათვის გაუგებარია, "რატომ არის სენსაცია ხელისუფლებასთან მისი შესაძლო თანამშრომლობა".

როგორც აბაშიძემ "ნიუპოსტს" განუცხადა, მაშინ როცა ოპოზიციაში იყო, "ქართულ ოცნებასთან" სხვადასხვა მიმართულებით აქტიურად თანამშრომლობდა.

აბაშიძის თქმით, ის მხოლოდ „ნაციონალურ მოძრაობასთან“ თანამშრომლობას გამორიცხავს.

"ოპოზიციაში რომ ვიყავი მაშინაც ხელისუფლებასთან თანამშრომლობა არც არასდროს გამომირიცხავს. საპარლამენტო დონეზე ძალიან ბევრი თანამშრომლობის მაგალითები არსებობს, ამ თანამშრომლობას საკანონმდებლო ხასიათი ჰქონდა. იყო თანამშრომლობა საგარეო მიმართულებითაც. არ ვიცი ახლა რატო არის ეს სენსაცია?! ხელისუფლებასთან კარგ, ქვეყნისთვის სასიკეთო საქმეში, ყოველთვის ვთანამშრომლობდით და მომავალშიც ვითანამშრომლებ"- აღნიშნა "ნიუპოსტთან" ზურაბ აბაშიძემ.

"თავისუფალი დემოკრატების" ყოფილი ლიდერის მტკიცებით, ხელისუფლებას პირადად მისთვის არანაირი თანამდებობა არ შეუთავაზებია.

"თავისუფალი დემოკრატები" ამ არჩევნებზე დამარცხდნენ, გამარჯვებული ძალა "ქართული ოცნებაა". არანაირი კონსულტაციები "თავისუფალ დემოკრატებთან" არ ყოფილა. ეს არის ჩემი შეფასება, ამას ვამბობდიო ადრეც და ახლაც იგივეს ვიმეორებ. რაც შემიძლია დანამდვილებით გითხრათ, არის ის რომ "ნაციონალურ მოძრაობასთან" არასდროს ვითანამშრომლებ"- განმარტა ზურაბ აბაშიძემ.

აბაშიძე ასევე უარყოფს ინფორმაციას, რომ პარლამენტში „ნაციონალური მოძრაობისა“ და „თავისუფალი დემოკრატების“ გაერთიანებაზე მოლაპარაკებები მიმდინარეობდა.

"ეს არის სრული სიცრუე, რა გაერთიანებაზეა საუბარი? - ეს არის "ნაციონალური მოძრაობის" აუხდენელი ოცნება" - თქვა მან.

კითხვაზე, მსგავსი მოლაპარაკებები ხომ არ გახდა, "თავისუფალი დემოკრატების" ყოფილი ლიდერების პროტესტი, რაც საბოლოოდ მათი პარტიიდან წასვლით დასრულდა აბაშიძემ აღნიშნა, რომ: "მოვა დრო და ამის შესახებ საჯაროდ ვისაუბრებ“.