გუშინ გვიან ღამით ინციდენტი მოხდა თბილისში. ორთაჭალაში 32 წლის ტრანსგენდერს ფიზიკურად გაუსწორდნენ. იგი ამ დრომდე სამედიცინო დაწესებულების რეანიმაციულ განყოფილებაში მართვით სუნთქვაზე იმყოფება. დაშავებულის ახლობლები დანაშაულისათვის კვალიფიკაციის შეცვლას მოითხოვენ.

როგორც ისინი აცხადებენ, დაზარალებულს ორი პირი თავს სიძულვილის მოტივით დაესხა, დანით ყელი გამოჭრეს, სახეზე კი დაზიანებები ბლაგვი საგნით მიაყენეს. ისინი ასევე აცხადებენ, რომ დანაშაული დაზარალებულის იდენტობას უკავშირდება.

გამოძიება განზრახ მკვლელობის მცდელობის კვალიფიკაციით მიმდინარეობს. წინასწარი ინფორმაციით, შსს-ს ამ დროისთვის არავინ დაუკავებია.